АьФ-лул Экономикалул министерствалул делегация Дагъусттаннай

[dropcap]И[/dropcap]юльданул 28-нний Дагъусттаннайн бувкIунни АьФ-лул Экономикалул лябуккулул министерствалул делегация. Мунил каялувчину ур министрнал 1-ма хъиривчу Михаил Бабич.


Гара кьини ДР-лул БакIчи Владимир Васильев ва Михаил Бабич бувкIунни МахIачкъалаллал хьхьирил машлул портрайн.
ХIакьину ва хъанай бур Аьра­сатнал Кьиблалул Дянивмур Азиянащалгу, Закавказиян­щалгу, Ираннащалгу дахIаву дуллалисса агьамсса транспортрал системалул ца бутIа. Ванил шинай духхайссар 3 млн. тонна хъуслил ва 7,9 млн. тонна навтлил.

Хьхьирил портрал давурттая хъамаллурахь бувсунни ДР-лул транспортрал ва ххуллул хозяйствалул министр Ширухан ХIажимурадовлул.
Ихтилатру бунни мукунма «Дагнефтепродукт» идаралул гендиректор МахIаммад-СултIан МахIаммадовлул ва цайминналгу.
Гара кьини Владимир Васильевлул ва Михаил Бабичлул ххал бивгьунни Каспийскаллал флотилиялул аьраличутурансса къатри. Цалсса бувну бур 4 къатта. Цинявппагу бур 528 квартира. Къатравун бизан тIий бур гьашину августрай.
Яла Владимир Васильев ва Михаил Бабич бувкIунни Каспийскалийн. Микку миннал ххал бивгьунни многофункционал медициналул центр. 76 къашайшалансса кIану бусса МФМЦ аьралуннал строительтурал бувну бур 30 кьини. Мунил лагру дур 3564 квадрат метра (виваллил лагру).

Му центр буван 2 гектар аьрщарал личIи дурну диркIссар Каспийскаллал централ азарханалий. Госпитальдануву гьарца аьркинлугъ ттизаманнул дур – компьютерданул томограф, рентген-аппарат, аппарат ИВЛ, анестезиологиялул кьай-кьуй ва цаймигу. Центрданул хъунама хIакин Расим Рамазановлул бувсунни медициналул центр хIадурну бушиву зий байбишин, цIана буцлай бур микку зунсса хIакинтал.