Гьашину 2 шинни жулла республикалий «ХIадур бува оьрчIру школалийн» тIисса цIанилусса чирилул акция дуллай. Ванил сакиншинна дувайссар ДР-лул ЗахIматрал ва социал лябуккулул министерствалул. Акциялул лагрулийсса мероприятиярду дувайссар шагьрурдай ва щархъавугу гъинтнил ахирданий, оьрчIру школалийн бачинсса хьхьичI гьантрай.
З. АьбдурахIманова
[dropcap]М[/dropcap]асалдаран, августрал 27-нний Дарбантуллал райондалийсса чIявусса оьрчIру бусса кулпатирттавасса цалчинмур классравун нанисса 100 оьрчIан ларсун дур дарсирдай ишла дуллансса кьай –ручкарду, портфельлу, тетрадьру, кьаланну ва цаймигу концеляр хъус. Укунссара акция дурну дур «Инсан» тIисса чирилул фондрал вакилтуралгу гьурттушинна дурну хьхьичIмур кьини Къизлардал оьрчIангу. ДР-лул Халкьуннал мажлисрал депутат, «Татляр» агрохолдинграл ген.директор ва чIявусса кIанттурдай меценатшиву дайсса ЯхIъя ХIажиевлулгу чIарах ацIаврийну Дарбантуллал райондалул агьали социал хIаллихшиннардил щаллу байсса центрданул пишакартурал дарсирайн бачинсса мюрщултран сакин дурну дур бахшишругу дачIлачIисса шадлугърал концерт. Дурну дур оьрчIан нахIу-нацIушивуртту дачIлачIисса тяхъашивурттугу.
Шиккува кIицI лаган, ларгмур шинал ва акциялул лагрулийсса мероприятиярду дурну диркIссар республикалул 37 муниципалитетрай. 2019 шинал акциялул кумаграйну канцеляр хъуслил щаллу бувссар чIявусса оьрчIру бусса кулпатирттавасса 2000 оьрчI.
«Маэшатрал кIюласса кулпатирттан кумагрансса ва ххуйсса акция аьдатравун дутарча, жулла республикалун ккаккиялунсса иш хьунссия. Жуятува эбрат ласунсса иширан ккалли хьунссия»,-тIий бур захIматрал ва социал лябуккулул министр Изумруд МухIуттинова акциялул гьурттучитурахь ва чIарахбацIултрахь барчаллагьгу тIий.
Акциялувух гьуртту хьуну бур республикалул Виваллил иширттал министерствалул пишакарталгу. Муниципалитетирттайсса полициялул зузалтрал къатра-къатравух бувккун, ахIвал-хIалданул кIюласса, чIявусса оьрчIру ябуллалисса кулпатирттан рюкзакру, альбомру, тетрадьру, кьаланну ва цаймигу кьай-кьуй дирхьусса кьуцуртту биян бувну бур. Ва ххуйсса чирилул давривух гьуртту хьуну бур Хасавюртуллал, Даг. Огниллал, Южно-Сухокумскаллал, Къуругьиял, МахIарамкантуллал, Къайтагъуллал, Дарбантуллал, Къизлардал, Ххунзахъиял ва Казбековуллал районнал полициялул зузалт. Акция республикалий нантIиссар августрал 31-ннин.
