[dropcap]В[/dropcap]ай гьантрай «Дагестан» РИА-лул редакциялий хьунни Дагъусттаннал региондалийсса «Справедливая Россия» партиялул отделениялул вакилтурал пресс-конференция.
Имара Саидова
[dropcap]Ш[/dropcap]икку гьуртту хьунни региондалул «Справедливая Россия» партиялул председатель, ДР-лул Халкьуннал Мажлисрал председательнал хъиривчу Камил Давдиев, региондалийсса партиялул отделениялул советрал член, ДР-лул Халкьуннал Мажлисрал депутат Марат Алияров, партиялул отделениялул советрал член Рашид ХIажиясулов.
[dropcap]М[/dropcap]ахъсса ппурттуву дурсса даврия, билаятрай коронавирусрал пандемия сававну хIасул хьусса тагьарданийн бувну, агьали багьайкунсса медициналул кумаграл дузалну къабивкIшиврия, ми ишру сававну ахIвал-хIал кIюла бувксса инсантурал чIарав бацIаву, ка-кумаг баву мурадрай ци чаранну ляхълай буссарив бусласисса ихтилат бунни Камил Давдиевлул. Ванал мукунма бувсунни, вай гьантрай билаятрайсса партиялул цайми отделениярттайгу хьушиву вава мурадрайсса пресс-конференцияртту.
-Махъсса 10-хъул шиннардил мутталий «Справедливая Россия» партиялул хъуннасса къулагъасрайн лавсун буссия агьалинал цIуллу-сагъшиву дурччаврил даража гьаз баврил масъалартту. Хар-хавар бакъа ялун дирсса коронавирусрал исват бунни жучIава къашайшалт уттубишинсса биялсса азарханарду бакъашиву ва муницIунма бавхIуну медициналул зузалтгу биялну къабивкIшиву. Аьмну хIисав булларчан, махъсса 15 шинал лажиндарай, оптимизация сававну, азарханардал сияхI чан хьуну диркIун дур.
БувчIлай бур укунсса шартIирдай Конституциялул тIалавшиннардайн бувну агьалинан буван ккаккан бувсса лавайсса даражалул медициналул кумаг бангу хъинну захIмат хъанахъишиву.
[dropcap]В[/dropcap]айгу, вайннухара лархьхьусса цаймигу захIматшивуртту дух даву мурадрайсса сиптарду гьаз дурссия партиялул фракциялул. Партиялул сукку дурсса сиптардавасса ца дия пандемиялул чIумал 16 шин хьуннинсса оьрчIансса кумагран дуллалисса 10 азарда къуруш арцул 18 шинавун бияннинсса оьрчIангу дулаву тIалав дуллалисса. Мукунма фракциялул члентурал оьрчIан кумагран дуллалисса арцу гихуннайгу дулаву тIалав буллалисса аьрза гьан бувссия ХIукуматрал председательнайн,-тIий, буслай ия Камил Давдиев.
Ванал мукунма балжину бувсунни агьалинал ахIвал-хIал лавай баву мурадрай партиялул сукку дурсса цаппара цаймигу сиптардая.
