Лавгсса бигьалагай гьантрай хъуншагьрулул Кировский райондалул бакIчи СалихI Сагидовлул сакиншиндарай Эльтав заводрал чIаравсса вацIлуву хьунни субботник. Мукунсса субботникру райондалул бакIчинал дувайссар ччя-ччяни. ВацIа буру­ччиншиврул дуллалисса давурттах СалихI Сагидовлул мудангу дур ца яла хъунмур къулагъас. Субботникрайн ва кьини бувккун бия 100-нния ливчусса инсантал: райондалул администрациялул зузалт, общественниктал ва лагма-ялтту яхъанахъисса халкь. Му кьини вайннал дартIун дур 15 машина бувцIусса цIинцI-ччюрк.

З.АьбдурахIманова
Райондалул каялувчинал бусаврийну, Эльтаврал вацIа мюхчан бан аьркиншиврул статус дулун хIадур хъанай бусса бур. Ва даврил лагрулий сияхIрайн ларсун дур ялув бацIантIисса аьрщарал 22 гектар. АрхIалла нани дурну дур вацIлуву, къадагьлай дуна, аьрщив дарчIусса иширттал хIакъиравусса хъирив лаявурттугу.
-Жу хъирив бувккун, ялун личин барду, хIарамзадаталгу гьурттуну, 6 гектарданийсса аьрщарал 82 парча бавчIуну ва бавххуну бушиву. Умуд бур, вацIа буруччаву мурадрай дуллалисса давурттал ххуллий, агьалиналгу, низам дуруччай къуллугърал ва судралгу кумаграйну, жуща вай аьрщив зана дан бюхъан­ссар тIисса»,-тIий ур СалихI Сагидов.