Лас-щарнил магьар личIи буллалийни, сси-къащилул ттуру-гъюрусса иширттавух чIявумур чIумал хIалану бикIай цичIав тахсир бакъасса гайннал оьрчIругу. Цаннал ца оьван дуллалисса тIуллугу пайханмарсса гайннал оьрчIай асар шай. Кьини дуккай личIи хъанахъисса лас-щарнил нитти-буттахъайхгу. Масалдаран, судрал хIукмулийну оьрчIру ниттичIа битарча, ганил яла гай ласнал ляхъиндалун ккаккан къабитлай, ххирашиврул гай бишин-битан къакIулсса ттатта-бавачIан къаитабакьлакьисса ишру чансса къабикIай. Магьар личIи барчагу, оьрчIалми ихтиярду ссуссукьу дуллан нитти-буттахьгума ихтияр дакъассар.
ТтаттахъачIан ва хъуннабавахъачIан оьрчIру итабакьин аьркиншиву нитти-буттал дянивсса хIукмулийну кьамул бан аьркинссар ва низамрайсса ххуллу-ххагу ххал бивгьуну, оьрчIалми ихтиярду дурурччуну дикIан аьркинссар. Лагьу-лахъунттаха ва масъала щаллу бан къахъанай бухьурча, судрал ягу къажимшиврул къуллугърал хIукмулийну бава-ттаттахъахьхьун ихтияр дулайссар оьрчIал ялун бучIавансса.
ЛичIи хьусса лас-щарнил цала оьрчIру бава-ттаттахъачIан лага-букIлансса низам сакин дайссар цайнува цивппа бавкьуну чичрулийнусса кьутIилий. Микку нотариуснал я пачат, ягу къулбасгу къааьркинссар. Му кьутIилий ккаккан дайссар кьинирдугу, ссятру ва чIун гьан дансса кIанугу.
Агарда оьрчIан 10 шин там хьуну духьурча, низамрайн бувну, ганалмур пикригу хIисавравун ласайссар.
Балики, оьрчIал нину ягу ппу бава-ттаттахъан оьрчIру ххал хьун къабитлай, ттярзлий бавцIуну бухьурча, гайннахь ихтияр дуссар кумаграл хъирив судрайн ягу къажимшиврул къуллугърайн буккансса. Судрал бувсса хIукмулийн къамютIий хъанай, бава-ттаттахъан ялагу оьрчIру ххал хьун къабитлай, хьхьичIа букьан буллай бухьурча, ниттий ягу буттай дишайссар административ журалул аьчIа — 2 азарда къурушрая 3 азарда къурушрайн дияннинсса. Мукунссара низам лияву ялагу тикрал хьурча, аьчIа дишайссар 4 азарда къурушрая 5 азарда къурушрайн диянуксса ягу ххюва гьантлийсса дуснакьраву щябитайссар.
Укунсса «талатавурттаву», психологтурал бусласаврийну, оьрчIал психика зия хьурча дакъа, я нитти-буттан цанна, я гайннал уссур-ссуннан цичIав хъиншиву, къулайшиву дакъассар. ОьрчIал яхI гъагъарча бакъа, цамур цичIав мюнпат къахьунтIиссар.
Залму АьбдурахIманова
