Августрал 11-нний ДР-лул ХIукуматрал Председатель Артем Здуновлул каялувшиврий хьунни ДР-лий экономика лядуккан даврил ва социал ишру цалий бацIан баврил хIакъиравусса Оператив штабрал батIаву.
Артем Здуновлул тапшур бунни цIусса кIанттурду дузал буллан. Мунал тIимунийну, му масъалалул хIакъиравусса информациялия хавар бикIан аьркинссар агьалинан.
Яла ххал бивгьунни агьалинан мюнпатну бацIансса масъала: МахIачкъалалив ахъулсса ва ахънилсса дахлансса машинарттаял (автолавкарду). Артем Здуновлул бувсунни, ялун ссут най душивугу х1исавравун лавсун, мукунсса дахху-ласулия хъунмасса хайр хьунтIий бушиву ишбажаранчитурангу, муштаринангу, хъус-хъиншивуртту кьюркьуну, оптовый багьлий дахлантIий бухьувкун.
ДР-лул Ишбажаранчишиврул ва инвестициярттал агентствалул хъунаманал хъиривчу Камил МахIаммадовлул тIимунийну, сакин бувантIий бур бахча бахлансса кIанттурду. Яла сентябрьданий байбихьлай бур ярмукIартту дуллан. Му масъала дузал баншиврул 10 автолавка машан ласунтIий бур.
Артем Здуновлул бувсунни республикалул ЦIуллушиву дуруччаврил министерствалул итадакьинтIий душиву 24 млн. къуруш коронавирусрал эпидемиялийн къаршисса профилактикалул давурттан.
Экономикалул ва территориал лябуккулул министр ХIажи Султановлул бувсунни гьашину Дагъусттаннай даву дакъашиврул сияхI лагьсса душиву дянивну ларсун билаятрайнияр. Мунал тIимунийну, гьашину пландалий ккаккан бувну бур зузи кIанттурду гьарза бан 4284 кIанттул. ХъунмурчIин ми кIанттурду хIасул хьунтIий бур ДР-лул Транспортрал министерствалий, ДР-лул Шяраваллил хозяйствалул министерствалий, ДР-лул Строительствалул министерствалий. Амма каширду дур цаймигу арардаву. Гьашину 6 зурул мутталий хIадур бувну бур 8261 зузи кIану, миннувату муданмасса – 2890, чIумуйсса – 2605 ва сезондалийсса – 2766.
Муния махъ министерстварттал каялувчитурал бувсунни цалва циксса зузи кIанттурду хIадур бувну буссарив ва цуксса кумаг бувну бувссарив ишбажаранчишиврун.
