Август зурул 5-нний региондалийсса «Единая Россия» партиялул отделениялий манзилданул режимрай агьали кьамул бунни АьФ-лул ПаччахIлугърал Думалул депутат Аьвдулмажид МахIрамовлул.
Имара Саидова
[dropcap]В[/dropcap]а кьини депутатначIан телефондалувух оьвтIисса агьалинал масъалартту бия ххуллурдайх асфальт бутIаврил, давурттал дузал баврил, цIуллу-сагъшиву дуруччаврил идарарттал даврил ва цаймигу иширттал хIакъиравусса.
Калининаул шяраву ХIажи МахIачевлул цIанийсса кIичIира бакьин бувну, цIубуккан баврил масъала «Мой Дагестан – мои дороги» тIисса приоритет проектравун бутансса кумаг бува тIий оьвтIий ия шяраваллил жяматрал цIания Тагьир Амиев. МахIрамовлул хIукму бунни му масъала ДР-лул Транспортрал министерствалийхчIин дузал бан.
МахIачкъалалив ялапар хъанахъисса Ислам Юсуповлул масъала бия цува даврил дузал аврил хIакъиравусса.
Ванал бувсуна хъунмасса хIаллай давугу дакъа, кулпатгу къашавай, захIматсса тагьардануву цува ушиву. Депутатнал махъ буллунни шайсса куццуй кумаг бан. Юсуповлухь увкунни электрон журалий сса цимурца чивчуну бувчIин буллалисса аьрза, гьан бува куну.
УнцIукIуллал райондалул агьалинал депутатнайн оьвкунни Шамилкъалаливсса республикалул районнал дянивсса азарханалул статусрал хIакъираву. 2019 шинал ва азархана, УнцIукIуллал райондалул азарханалуцIун цачIун бувну, юридический статусрацIа бувну бивкIун бур. МахIрамовлул ва масъала цала бакIрайн лавсун, ЦIуллу-сагъшиву дуруччаврил министерствалул каялувчитуращал маслихIат ккавккун щаллу бансса махъ буллунни.
Депутатнал ва кьини, вай бакъасса, цаймигу цIурувкьюсса масъалартту щаллу бансса чаранну лякъиншиву бувсунни.
