МахIаммадлул душ ХIандаева Ххадижат
Къашавай бивкIун хъун хlалгу къавхьуну августрал арулунний жуятува лавгунни 1-мур ЦIувкIратусса захIматрал ветеран Хlандаева Ххадижат Махlаммадлул душ.
1-мур Цlувкlрав 1967- ку шинал школагу къуртал бувну, щар шайхту, Ххадижат Махlачкъалалив зун бувххуну бур Сепаратор заводрайн.
Заводрай зузиссаксса хlаллай цимилагу лайкь хьуну бур барчаллагьрал грамотарттан ва бахшиширттан. Бувчlуну буссия комсомол бригадалул хъунмурнугу. Ваниясса суратращалсса макьала дуссия «Дагестанская правда» кказитрайгу.
Махъсса шиннардий зий буссия къатравун гъили щин ва гъилишиву дуллалисса Махlачкъалаллал идаралийсса котельний операторну.
Ххадижат дакI- аьмал хъинсса, хIал бавкьусса хъамитайпа буссия. Ва дунияллия лагаврил кьурчIишивугу кIидачIлай, жижара буллай буру ванил арснахь, душваврахь, наслулухь, уссихь, гъан- маччацириннахь. Цув алжаннул ххари буваннав, рухI бигьаний дишиннав!
1-мур ЦIувкIуллал жямат.
МАХIАММАДЛУЛ ДУШ ШАБАНОВА ЖАМИСАТ
Августрал 7-нний оьрмулул 87 шинаву аьпалул хьунни цилва бусса оьрму махъа нанисса никиран кIулшиву ва тарбия дулаврин хас бувсса, ГьунчIукьатIрал шяравасса Шабанова Жамисат МахIаммадлул душ.
Жамисат МахIаммадовна бия ххаллилсса учительница. Ванил захIматрал луттирай дуссия дурагу ца чичру: «ГьунчIукьатIрал школалул оьрус мазрал учительница». Ва бия Занналва муаьллимну ляхъан бувсса инсан. Жамисатлун хъинну ххирая оьрчIру, школа, цуппа зузисса коллектив. Ванил, мяш бакъа, цилла дусса чIунгу, гужгу бишайва оьрчIал кIулшивуртту гьарта-гьарза, куртI даврин, минная ххуйсса инсантал, цалла шяраваллил патриотътал шаву мурадрай. Ванил дарс дирхьусса оьрчIру кIама бивщуну буссар щаллагу дунияллийх, цивппа чув бунугу, миннал ва мудангу дакIнин бутайссар бусрав-барчаллагьрай, цилва пишалух эшкьи хьусса учительницану ва дакI тIайласса тарбиячину.
Жамисат бия маз пасихIсса, ихтилат усттарсса шаэргу, итабавкьуссия цилва чивчусса шеърирдал жужгу. Ва бия хъатIал-хъиншивурттал цIу-цIанпир ххи байсса балайчигу.
ПаччахIлугърал чIярусса шиннардий дакI марцIну бивхьусса захIматран кьимат бишлай, ванин дуллуссар «Дагъусттаннал лайкь хьусса учитель» тIисса бусравсса цIа.
ГьунчIукьатIрал школалул педагогтурал щалвагу коллективрал чулуха кьурчIишивугу кIидачIлай, дакIнихтунусса жижара буллай буру Жамисатлул душваврахь, махъсса гъан-маччанахь.
Жамисатлул рухI алжаннул ххари даннав, ванин бакъасса оьрму ванил душвавран, вайннаяту бивзминнан булуннав.
ГьунчIукьатIрал дянивмур
даражалул школалул
коллектив
Оьрмулул 93 шинаву ахиратравун лавгунни ххаллилсса хъамитайпа, гьунар бусса, бусравсса зузала культуралул личIи- личIисса идарарттай зий, ккаккиялунну захIмат буллай бивкIсса ЧIяйннал шяраватусса Кариннул душ Рамазанова Мариян.
Мариян бувну бур августрал 16-нний 1927-ку шинал. ЧIивисса оьрмулий, цила кулпатрал ахIвал гьаз бан, мюрщими уссур-ссуннан ка-кумаг буван, чIивину бунува захIматрахун багьну, личIи-личIисса давурттай зий бивкIун бур школалий ккалаккисса шиннардийва.
Буттал шяраву школагу къуртал бувну, Мариян бувххун бур Москавливсса Библиотекарттал институтравун. Институтгу къуртал бувну, 1961-ку шиная шинмай зий бивкIссар жулла республикалий личIи-личIисса библиотекалул давурттай. Мариян Каримовна хъинну тIалавшинна дусса, цила дуллалисса даву кIанийн дуртун, гьарца чулуха марцIну, хьхьичIунну биттур дайсса инсан бия. Ва зий бивкIссар республикалул Методкабинетраву методистну, миккува отделданул хъунмурнугу, А.С.Пушкиннул цIанийсса библиотекалул хъунмур библиотекарьну, отделданул хъунмурну «Дагкниготорграл» директорну, «Дом книгалул» директорнал хъиривмурну. Цила дуллалисса гьарца даврих лавайсса кьиматран ва хIурматран лайкь шайва Мариян гьарца кIанай.
Махъсса чIумал, 1999-ку шиная 2015-ку шинайн бияннин ва зий буссия Лакрал театрданул хъунмур администраторнал къуллугърай.
Театрданул даву дакIнихтуну биттур дуллай хъунмасса захIмат буллай зий бивкIунни Мариян шяравусса бикIу, шагьрулийсса бикIу тамашачитуращалсса дахIавугу дурурччуну.
Инсантуращал хIала-гьурттусса, дакI хъинсса, дугърисса хасият дусса хъамитайпа бия Мариян, цинявннан ххирассагу бия.
Мачча-гъаннахь, щарнил агьулданухь жижара буллай буру. Марияннун алжан нясив баннав, рухI хъинний дишиннав, бунагьирттал аьпа баннав цил.
Лакрал театрданул
коллектив
КъутIа-Аьбдуллул арс МахIаммад-Рашад
Оьрмулул 72 шинаву аьпалухьхьун лавгунни Ваччатусса КъутIа-Аьбдуллул арс МахIаммад-Рашад.
Рашад увну ур 1948-ку шинал Ваччиял шяраву. Ванал захIматшиврул ххуллу байбивхьуну бур, армиягу лавхъун, Каспийскалий «Дагдизель» заводраяту 1971-ку шинал. Заводрай зун икIайхтува Рашадлул чIалачIи бувну бур цала бюхъу-тяхъа. ЧIал къавхьуну ваная хьуну ур бригадир. Зий айивхьуну кIира шинава ванан дуллуну дур медаль — «Победитель соцсоревнования 1973 года». Муния махъ увчIуну ур 15-мур цехрал комсомол организациялул секретарьну. Заводрай зузиссаксса хIаллай сайки гьарца шинал ванал хIалал дайсса диркIун дур ХIурматрал грамота, заводрал ХIурматрал улттуй чан къархьуну дур ванал сурат.
Рашад гьарца чIумал хIала-гьурттуну уссия Ваччиял жяматрал дуллалисса давурттавух. Ванал авторитет Ваччиял жяматрал, дустурал дянив мудангу ларайсса дуссия. Хъунмасса хIаллай ва уссия Ваччиял жяматрал организациялул оргкомитетрал членнугу. Ва хIала акъа шяраваллил царагу даву къашайссия. Махъсса ппурттуву Рашад зий уссия М.ХIажиевлул цIанийсса заводрай.
Цал бунагьирттал аьпа баннав, рухI рахIатний дишиннав.
Ваччиял жямат
