На Урувун вертолетрай бувкIсса куц

[dropcap]Д[/dropcap]ия 70-ку шинну. Жу, хъунмур ссугу, нагу, мукьва мюрщисса оьрчIащал, шагьрулия Лаккуйн най буру.Ттул хъунмур ссу КIулушацIрал шяравун щар хьуну бия,

мунияту жу цал КIулушацIун лавгру, кIикку, ссил къатраву хьхьугу руртун гьун­ттий Урувун ниттичIан гьансса пикрилий.


Амма жу шяравун бувкIсса чIумал ссил къатраву Нальчикраясса геологтал бия. Циняв къатраву дия миннал экспонатру: чартту, кристаллу ва аьрщи дусса кьуцуртту.Миннал вертолетгу дия шяраваллия арх бакъасса аэродромрай дарцIуну. Геологтуран тIааьн къабивзунни жу бучIаву,хаснува жущал мюрщисса оьрчIру бушиву.Жу цала хъиривлаявурттахун бахчиланссар тIий бухьунссия. Тагьар бувчIуну, жу геологтурахь увку­ссия, чIаххурайсса шяраву жух нину ялугьлай дуссар, зучIава машина бухьурча, жу тиккун биян бара куну.Муния ми хъинну рязи хьуна. Вертолетрай биян банну увкуна. Жугу ххари хьуру. ЩихьчIав ттуккугу була увкуну, жула хъирив нанисса ниттихь бусан анавар бувкру. Геологтурал рациялувух жу оьвчарду шяраваллил советрал телефондалийн. Шяраваллил советрая арх дакъа дуссия жул къатригу. Бусарду ниттихь хъирив дучIан къааьркиншиву, жува вертолетрай бучIант1ишиву.
— Мугу циригъар?-цIувххунни ниттил.
— Самолет куннасса , гьаваллавух леххайсса затри.
-Я, ттул душ, ци самолет тIий бура ина, Урив аэродром чув буссар?
-Дадай, летчикнал лякъин­тIиссар му дацIан дансса кIану. Ялугьлагьу.
Жул ихтилат бавсса советрал къатравусса инсанталгу хъярч- махсарарив , бунияласса хавардив къабувчIлай бивкIун бур.
ХIасил, щябивкIру жу циняв вертолетрай. Ххаришивугу дур, нигьагу буслай буру. Пилотътурал, ми кIия ия, жухь гилунмай буруглаги, зула шяравалу ххал шайхту бусияра кунни. Ца пилот рульданух щяивкIунни, гама авцIунни ачIину чурттуй, ачIину салондалуву.
— Зула шяравалу ххал шайхту, ттул хIажак кIункIу дара, так хъинну мадару, ликкаруча, — хъярч бунни ганал. Дахьва рахIатну щябивкIун лахъния жулла зун­ттай, ар-майданнай тамаша булланна тIисса чIумал, шяравалу чIалан диркIунни. 5-6 минутрай жу шяравун бивну бияв. ЧIалай дур школалул спортплощадкалийх тиху-шихуннай лечлай , жуйнна кару галай дуллалисса нину. Га диркIун дур вертолет гикку дацIанссаххай. Му дарцIунни шяраваллийн тIайлану, неххал тия чулийсса кьасса гъа­ттарал лухччиний. ГацIана шяраваллил халкь бувкIун лагма лавгунни. Гай ках-шах тIий, вертолетрай тамаша буллай бия. Пилотътурал махъ буллуна жу­хьхьун МахIачкъалаливгу цащала архIал буцинну куну. Жу бувсъссия жува ялавай та бачинтIи­ссарив. Амма гай шанма гьантлул хьхьичI бувкIуна, Нальчикрайсса управлениялия зана шияра тIий оьвтIий буну. Утти махъунмай бучIаншиву къакIуллича тIий, цала махъ бацIан бан жул хъирив бувкIун бия. Жугу анавархъиндарай хIадур хьуру.ЦIунилгу щала щар дартIунни вертолетрачIан. Циняв ссайгъатирттащал бувкIун бия: куннахь нагьлил банка, куннахь нисирал гурга, куннахьгу хамил ччатI ва муму- тамур. НицIал банклущал увкIуна найрдучи Валигу.Жу ми ссайгъатругу пилотътуращал кIибавчIуссия. ХIасил, укун вертолетрай бувкIссару жу МахIачкъалаливгу. Таний шяраваллил жяматрангу, жун жунмагу ва тамаша бансса ва дакIний личIансса иш хьуна.
Анисат Уцумиева,
ХIадур бувссар А.Аьбдуллаевал