Коронавирусрал къашавайми жулва билаятрай ялу-ялун чан хъанай бур, бивщусса буран-мурчая махъ кунма, билаят цийнма цуппа букIлай бур. Талатаврил майданнай кунма, ва тагьарданий ливтIу-бивщумигу къачансса хьунни. Амма, цимирагу нюжмардий, зурдардий ичIувами, гъан-маччами къаккавккун, рахIатну лавхъсса шану,

паракьатну дуркусса дукра хъамадиртун зий-занай бивкIсса хIакинтурал хIарачатрайн бувну, цикссагу инсантурал оьрмурду ххассал хьунни. Мукун зий бивкIсса виричусса хIакинтуравух бур КIундиннал шяравасса жагьилсса хIакин ХIажиева Мирада Кьурбаннул душгу. Мирада зий бур Москавуллал шагьрулул клиникалул 52-мур азарханалий.

---

Бадрижамал Аьлиева
Бувну бур Мирада МахIачкъа­лалив Кьурбаннул ва Радимал кулпатраву. МахIачкъалаллал шагьрулул 29-мур школагу мусил медальданий къуртал бувну, бувххун бур Дагъусттаннал паччахIлугърал медициналул университетравун. Му бувккуну махъ Мирадан ччан бивкIун бур гихуннайсса дуккаву республикалул кьатIув дачин дуван, цинна аьркинсса специализациялул (гематология, аллергология) ординатурагу жулла республикалий бакъахьувкун.

Мукун, Мирада лавгун бур Москавлив, бувккуну бур Евдокимовлул цIанийсса МГМСУ-раву аллергологиялул ва иммунологиялул ординатура. Зуншиврул ординатуралуву ларсъсса кIулшивуртту къадиялшиву бувчIлай, ванин ччай бивкIун бур даву канилух дурксса, авадансса опыт бусса насихIатчитурал каялувшиндаралу, бургаврилу зун. Ларгсса шинал ноябрь зуруя шинмай Мирада ХIажиева зий бур Москав шагьрулул клиникалул 52-мур азарханалий аллергологну-иммунологну. Хасну ва клиникалий бакIрайн багьнугу бур ванин цинма ччай бивкIсса куццуйсса насихIатчитал.
Ванил нину-ппу ялапар хъанай бур МахIачкъалаллал зума-къирагърайсса ЦIусса Хушет поселокрай. Кьурбан ур строитель, тIаннул ва муххал лавайсса даражалул усттар, Радима – бухгалтер. Мирадал уссил Сяидлулгу язи бувгьуну бур медикнал пиша, ва стоматологну зий ур Москавлив.

— Февраль зурул ахирданий жул азарханалун ккаккан бувна пневмония дусса къашайшалтрансса цалчинсса корпус. Му чIумал байбивхьуна цинявппагу хIакинтал вирусращалсса талатаврийн хIадур буллай. Жу жувагу, хIакинтал, интернетраву хасъсса лекцияртту ккалай, тестированияртту дуллай, цIу-цIусса кIулшивуртту ласлай буссияв, му вирусращалсса хьунабакьаврийн хIадурну бикIан.
Ттун ттулва буруккин бувагу бакъая, ттуйннагу лахъанссар му азар тIисса нигь дакъая, къашавай хьурчагума, ттулва уртакьтурал хъин банссара тIий буссияв – на буруккинттарай буссияв ттулва оьрмулул ва ттулла цIуллу-сагъшиврул ялув пикрирдайсса гъанминнал.

Миннан ччай бия на коронавирус дусса къашайшалт хъин буллалаврия махъаллил хьуну. Ттун кIулссия Дагъусттаннай­сса ттулва однокурсникталгу, цалва пикри къабувну, инсантурал оьр­мурду ххассал буллай бушиву.
Ва ялагу, ттул буруккин бия ттущала ца къатлуву ялапар хъанахъисса ниттил ниттирссийн ттуятура азар лахъанссар тIисса, мунияту, отельдануву кIану шайхтува, на гивун бивзра.

Гиву жун хъинну ххуйсса шартIру щаллу дурну дия. Жу, личIи-личIисса профиллал пишакартал, хъачIрай хъачI дирхьуну зий бивкIру ца аьм­сса давриха. Амма къаинфекционистъталсса жун хъинну захIматну бия цалчин жунна хьунадаркьу­сса коронавирусрал инфекциялущал талан, мунияту къуццу тIийгу бивкIру махъ бувксса протоколлайн бувну. ЛичIи-личIисса пишакартуращалсса зузаврия ттун хъунмасса мюнпат хьунни. Аллагьнайн щукрур, хIакинтурава къачIявуссаннайн лархъунни ва азар, лархъмигу хъин хьунни. Ттул чIарахгу дурккунни му азар, — буслай бур Мирада.

Махъсса цайми хIакинтал кунма, Мирадагу зана хьунни цила даврийн, аьдатсса низамрайн. Амма уттигу, иш багьарча, Мирадагу хIадурну бур, цилвамур оьрмулия ва цIуллу-сагъшиврия ка ларсун, цайминнал оьрмурду ххассал буллан.
Къабукканнав мукунсса жулва хIакинтурайн. Къабагьаннав Мирада кунмасса жагьилтуран цалла кIулшивуртту, цалва язи бувгьусса пишалийнсса дакI тIайлашиву, хаин къашаву талатаврил майданнай чIалачIи дуллан.