Ххал бивгьунни национал проектру бартдигьаврил масъала

[dropcap]И[/dropcap]юльданул 22-нний ДР-лул ХIукуматрал Председатель Артем Здуновлул каялувшиврий хьунни Республикалул Министртурал кабинетрал батIаву. Цалчин ххал бивгьунни Дагъусттаннай национал проектру дузрайн дуккан даврил масъала.


ДР-лул ХIукуматрал Председательнал 1-ма хъиривчу Анатолий Карибовлул бувсунни «Демография», «ЦIуллушиву дуруччаву», «Культура», «Давуртту лядуккан даву ва зузи кIанттурду дузал буван кумаг баву» тIисса проектру бартдигьаврил хIакъираву.

Анатолий Карибовлул бувсунни «Демография» тIисса проект­рал лагрулий бартдигьлай бу­шиву укунсса регионал проектру: «ОьрчIру бувсса чIумал кулпатирттан арцуйнусса кумаг баву», «Хъунмур ник», «Хъаннин кумаг баву, оьрчIал 3 шин хьуннин яслирдай кIантту бувну», «Жяматийсса цIуллушиву цIакь даву», «Спорт – оьрмулул нормар».
«ЦIуллушиву дуруччаву» тIисса проектрая буслай, Анатолий Карибовлул кIицI бунни, Минздраврал ххуттайсса цинярда кьутIирду чичин най бушиву гьашину августрал ахирданийннин. Мунал гьартану бувсунни «КъюкIлил ва туннурдал азардащалсса талатаву» тIисса региондалул проектрая. Мунил лагрулий ласун най бур уттигу 3 компьютердал тамограф. Мунал бувсунни мукунма ци дуван най буссарив «Онкологиялул азардащалсса талатаву» тIисса проектран хасну.

Анатолий Карибовлул бувсунни лирчIми проектру бартдигьаврил хIакъиравугу.
Артем Здуновлул тIимунийну, пандемиялул захIматшиву дурну дур нацпроектру цила чIумал бартдигьавриву, мукуннугу, ДР-лул Минздраврал машан ласун аьркинссар циняв медициналул аьркинлугъ ва даруртту.
Мунал бувсунни противотуберкулезрал диспансер ва цаймигу медициналул объектру баврил хIакъиравугу.