[dropcap]У[/dropcap]ттигъанну Рязаннай академик Павловлул цIанийсса Медуниверситет къуртал бувминнан дипломру буллалисса шадлугъ хьунни. Роспотребнадзорданул тIалавшиннардацIун бавкьуну,
шадлугъ дунни медициналул маскардаву: хъамалгу, преподавательталгу, цивппа студентъталгу кувнная кув архну бавцIуну. ЯтIул дипломру лавсминнавух бур Каспийскалив хъунма хьусса ХIажиева Нужабатгу.
П. Рамазанова
Ванил нину Лиана 1-мур ЦIувкIратуссар, Ккуллал райондалул агьалинан ххуйну кIулсса Загьидинов ХIамидлул душри, ппу МахIаммадрамазанма ЧIятуссар. Нужабатлул буттал нину Аматулла Совет Союзрал Виричу ЦIаххай Маккаевлул агьулданиятусса бур. Нужабат ХIажиевахьхьун ятIул диплом буллай, Медуниверситетрал ректорнал барчаллагь кунни марцIну ххювардай дуклай бивкIшивруцIун, вузрал жяматийсса оьрмулул иширттавухгу чялишну гьуртту хъанай бивкIсса Нужабатлухь. Дуккавривусса, хIакин хIисаврайсса ва медициналул элмулувусса ванил ккаккиярттугу, бюхъу- хIарачатгу чIалай, хьхьичIунсса выпускницахь Медуниверситетравува дарсру дихьлан бацIан маслихIат бувну бур ректоратрал.
Ванил гъан-маччаминнал бувсмунийн бувну, Нужабат бувар, университетравува бавцIуну элмулулсса ва кIулшивуртту дулавриха зунссарив ягу азарханалий инсантал хъин буллай зунссарив хIукму буван. Цукунсса хIукму буварчагу, Нужабат хIарачатрай зунтIиссар, цийнна дурсса вихшала цIакь дуван.
Ва вуз (кутIану академик Павловлул РязГМУ учай) цуппагу Аьрасатнал вузирдаву ца яла сийлиймур бур. Рязаннал областьрал губернатор Николай Любимовлул увкусса куццуй, Рязаннал Медициналул университетрал диплом лавсминная лавайсса даражалул хIакинтал, даву куртIну кIулсса касмукартал хьунссар тIисса гьанурду ва хIучча буссар. Жувагу дакIнихтуну чIа учинну жулва лакку душнин гихунмайгу тIайлабацIу!
