Лакрал театр – онлайн-кьаралданий

Коронавирусрал инфекция ппив хъанахъаву сававрайн був­сса ссуссукьушиннардал ппурттуву А. Къапиевлул цIанийсса Лак­рал паччахIлугърал музыкалул ва драмалул театр,

Аьрасатнал цаймигу магьирлугърал идарартту кунма, зий буссия цIусса журалий – онлайн-кьаралданий.


Зулайхат Тахакьаева
Ва журалийгу, жула артистурал ккаккан дунни ларайсса пишакаршиву, ссахчIав къубурувгун, гъирарай зий бия ми ссу­ссукьушиннардал шацI бувсса лакрал тамашачитурал дакIру дан.
Чялишсса гьурттушинна дунни артистурал щалвагу Аьрасатнал лагрулийсса гьарцагу акциярдай: «Библионочь 2020», «75 слов Победы», «Литература Победы», «Мы все равно скажем вам спасибо» ва цаймигу. Му журалий зий, виртуал пространствалий миннал цачIун бунни цикссагу азаллийсса дагъус­ттанлувтал.

Ютуб-каналданий кка­ккан бунни тамашачитуран ххира хьусса спектакллу ва проектру, дакIнийн бивчунни хьхьичIавасса спектакллу ва жуятува лавгсса артистал – сахIналул хIакьсса усттартал.
Онлайн-кьаралданий зузи­ссаксса мутталий Лакрал театрданул Ютуб-каналданий бавтIунни ххюазарунния ливчусса тамашачитал. Мукунна чялишсса даву дуссия «Инстаграм», «Фейсбук», «Одноклассники» соцсетирттавугу.
«Память нашей Победы» ва «Мы все равно скажем вам спасибо» тIисса, Ххувшаврил 75 шинан хас бувсса, так вай кIива акциягума соцсетирттаву ххал бувну бур ряхцIалазарийла.

Мукунма чялишну ккаккан бувссар онлайн-кьаралданий акция «Библионочь 2020».
Июль зурул 18-нний 16.00 ссятраву Ютуб-каналданий ккаккан бантIиссар спектакль «Щарнил нину» (Г. Хугаевлул). Режиссёр-постановщик, чIярусса шинну Лакрал театрданущал уртакьну зий дурсса Геннадий Якунин, ччяни жуятува батIул хьусса. Ва спектакльдануву тамашачитуран ккаккантIиссар дакIния къауккайсса жула хъунасса артист Садикь МахIаммадов.

Июль зурул 27- нний тIурча, 16:00 ссятраву халкьуннал балайрду ххираминнаща бю­хъантIиссар ххал дан концерт «Чагъанттул чIурду», Навруз Шахбазовлул каялувшиндаралусса халкьуннал инструментирттал оркестрданухун.
ЦIанасса чIумал театр зий бур онланй-кьаралданий репетицияртту дуллай.
Умуд бур ххирасса артистътурах мякь бувксса тамашачитал, чIал къавхьуну аьзиз­сса театрдануву хьунабакьин­ссар тIисса.

Читайте также: