[dropcap]М[/dropcap]ахIачкъалалив, Сулайман Стальскийл цIанийсса сквердануву, хьунни «Буруччияра цаннал ца» тIисса, ххуллурдай аварияртту чан шаву,
ми къахьунсса чаранну лякъаву мурадрайсса акция. Мунил сакиншинначиталну бия Жагьилтурал иширтталсса буллалисса министерство ва МахIачкъалаллал ГИБДД — лул отдел.
Андриана Аьбдуллаева
Шикку гьуртту хьунни «Ябувара оьрму» цIанилусса жяматийсса организация, кIулшивуртту дулаврил управлениялул вакилтал, мюрщи инспектортал. «Байрандалул фабрика» тIисса клубрал аниматортурал тIуркIурдайну бувсунни оьрчIахь ва нитти- буттахь ххуллул низамрая, дунни ххуллурдай личIлулну бикIияра тIисса оьвчаву.
Миккура хьунни ххуллул низамрал тIалавшиннарду цукун кIулну дурив ххал дигьлагьисса конкурсру ва тIуркIурду. Цинявппагу гьурттучитурайх дарчIунни профилактикалул буклетру ва чанна лахъайсса затру. ОьрчIан дуллунни «Анжи- ареналул» чулухасса бахшишру. Мероприятиялул ахир дуллай, Жагьилтурал министерстволул консультант МахIаммадсаид Аьлиоьмаровлул кIицI лавгунни укунсса мероприятияртту ччя- ччяни дуллан аьркиншиву, ххуллурдайсса тагьарданух ххишаласса къулагъас дикIаншиврул. МахIачкъалаллал ОГИБДД-лул хъунама Ибрагьим Бабаевлул кIицI лавгунни акциялул мурад шагьрулул ххуллурдай оьрчIру бала-апатIирттая мюхчан баву бушиву.
