[dropcap]Ш[/dropcap]еъри ляхъан баншиврул цукунсса кьюлтIшиврул нуз тIитIин аьркинссарив щинчIав кIулсса зат бакъар. Буниялагу, зува пикри бара, цинявннан кIуллихха лакку мазрал хIарпирдай чичрурду дуван.
Амма ми хIарпирдая, Аллагьнал буллусса пагьму бакъахьурча, ина ми цукун кувннил хъирив кув дихьларчагу, чIаравманал дакI тирх учин дансса калима вища хIасул дуван бюхълай къабикIай. Инсан муданагу луглай ур ххуйшивурттах.
ЦIанасса замана хъинну ххуйсса бур пагьму бусса инсантуран. Циван учирча, пагьму буманаща цала бюхъу бигьану инсантуравун буккан бюван бюхълай буну тIий.
Вана уттигъанну, майрал 29-нний, бувксса «Илчи» кказитрал 22-мур номерданий бивщуну бия Аминат АхIмадовал шеърирду. Ттун уттинин бакIрайн къабагьссия ванил шеърирду. ХIайп тIий ура. Ци ххаришиву дия учирча, бувчIлай бия ванища лакку мазрай чичин бюхълахъишиву инсаннал дакI тирх учин дансса шеърирду.
Аминатлул шеърирду бур умудрайсса, ккалаккима вихшала дишин уллалисса. Ттунмагу укунми шеърирду ччан бикIай.
КIулсса зат бур оьрмулуву гьарца зат ца кьяйдалий най къабикIайшиву. Дагьанттул хьхьичIалу чаннасса, махъалу цIансса дикIайшивугу жунма кIуллихха. Аминатлул шеърирдал хъурссувух нанийни, ччаннан кIул хъанай дур аьрщарал гъилишивугу, ссуттихуннай хъурссува бакIлахъиягу ласун хьунтIий душиву.
Барчаллагь, Аминат, шеърирду ххираминнан ина бахшиш дурсса, уттинин жун къакIулну диркIсса дуниял дагьанттуву чIалачIи даврихлу.
ТIайлабацIу баннав!
ХIажимурад ХIусайнов,
ш. Вихьул
