ДакIнил тIитIаву ва касмулул магьиршиву

Камил Абакаров

Вай махъсса зурдардий цIуллушиву дуруччаврил чIявусса зузалтрал ккаккан бунни цалва гьунарду. Явара, ва «гьунар» тIисса махъгу,

бунияласса, цал бакъача, чIявусса гьантрай кка­ккан бувсса иширан хIисавну хьунни.

Ккуллал райондалул азарханалийгу бия ца барз ва бачIинний муна му пасатсса азарданул къашавай хьуми хъин буллай.


ХIакьину ттун бусан ччай бур барз ва бачIиннул лагрулий къашайшалтрал чIарату ша чулийнмай къабувсса хIакинная. Ихтилат чансса, амма дуваймурдив ванал дазу-зума дакъасса дур. Ккуллал шярава бувкссар лакрал цIа бюхттул дурсса чIявусса вакилтал. Вайннал дяниву цалламур цIагу чирчунни Абакаров Камил Ибрагьинхалиллул арснал. ХIакиннал касму Абакаровхъал тухумралла ирсирай нани­ссанун хIисав дан бучIир.

Камиллул буттауссу Ургъу зий ивкIссар хIакинну Москавлив. Ваная хьуссар профессор, медициналул элмурдал кандидат. Аьрасатнал хъуншагьрулий хIурматрай зий ивкIсса буттауссил касму чIивинияцIара Камиллул бакIраву кюру бувну духьунссия. Камиллул бутта Ибрагьинхалил ивкIссар дянивсса даражалул кIулшиву ларсъсса, циняв Ккуллал колхозрал трактордалми «цIуцIавуртту» хъин дай­сса механизатор.

Махъсса шиннардийгу зий ивкIссар школалий автоделалул дарс дихьлай. Камиллул нину Ажи, зунттал чIявуми хъами кунма, колхозраву зий бивкIссар.
Камил увну ур 1962-ку шинал Ккулув. Школа къуртал байхту, 1980-ку шинал увххун ур дуклан Дагъусттаннал Мединститутравун. Му къуртал байхту, 1986-ку шинал ва тIайла ув­ккун ур зун Свердловскаллал областьрайн. Хьуну ур ваная терапевт, инфекционист, геронтолог, окулист, психиатр. ХIасил, учин бучIир ванайн «специалист широкого профиля» куну. Чан-кьансса вичIи дишинну утти Камиллухгу:
— Свердловскаллал областьрай зий на дурссар мукьра шин. Тиха учIайхту, мукьра шинай зий уссияв Хъусращиял шяраваллил ФАП-рал хIакинну. Яла на увцунав зун шиккун, райондалул азарханалийн. Аьмну, хIакинну зий ттул хьуну дур 34 шин.

— Камил, бувсун ччива коронавирусрал къашайшалт хъин буллай ивкIсса чIумуягу.
— Ккуллал райондалул азарханалийн цалчинсса къашайшала увкIуна май зурул 6-нний. Хъин буллай бивкIру июньдалул 17-ннийн. Аьмну хьуна 103 къашайшала. Вайннаяту жущава хъин ан къахъанахъисса мяйя тIайла увкссия МахIачкъалалив. ХIайп, гай жу тIайла бувксса къашайшалтрава кIия ххассал уван къабювхъуну бия. Ца — Ссухъиящатусса, гамагу — 2-мур ЦIувкIратусса. ЖучIасса къашайшалтрал, ца гьутрурдал­сса дакъагу, къюкIлил, ччаруллал, нярал ва цаймигу базурдал цIуцIавурттугу архIалла хъин дуллан багьлай бия. Жу ца сменалий буссияв: ца хIакин, кIива медсестра, кIива санитарка. Зий буссияв ряхра ссятрай. Мукьва бригада буссия. Яла чIявусса, 45 къашайшала усса чIун хьуна. ЧIявуми цивппагу хъами бия.

— Камил, вила кулпатраягу бувсун ччива.
— Ттул оьрмулул дус Вихьуллал БарцIулавхъал Кьурбаннул ПатIимат тIисса душ бур. Ва бур аптекалий зузисса фармацевт. Жул бур кIива душ ва ца арс. Ца душ Москавлив зий бур хъаннил хIакинну, арс дуклай ур ккарччал хIакин хъанай. Шиккува кIицI бан ччива ттул кIия уссу, Сунгъур ва Абакаргу, хIакинтал бушиву.

Уттигъанну Ккуллал райондалул азарханалул зузалтран кьимат бивщунни Дагъусттаннал БакIчи Владимир Васильевлул ва Дагъусттаннал ЦIуллу-сагъшиву дуруччаврил министерствалул. ЧIявусса зузалтран дуллунни хIурматрал грамматартту ва барчаллагьрал чагъарду. Абакаров Камиллун дуллунни «Дагъусттаннал лайкь хьу­сса хIакин» тIисса хIурматрал цIа. Ва цIагу барча дуллай, жувагу чIа учинну Камиллун цIуллушиву, цIу-цIусса ххари-хъиншивуртту.

Читайте также: