Ятту ябаврин кумагрансса чаранну

[dropcap]В[/dropcap]ай гьантрай Республикалул премьер Артем Здуновлул каялувшиврий хьунни ДР-лул ХIукуматрал батIаву. Муний ххал диргьунни республикалий ятту ябаврил тагьар ва ми дазул кьатIув машай буккан баврил хIакъиравусса масъалартту.


БатIаврий гьуртту хьунни ДР-лул ХIукуматрал Председательнал хъиривчу Аьбдулмуслим Аьбдулмуслимов, ДР-лул Шяраваллил хозяйствалул ва бакIлахъиялул министр Абзагьир ХIусайнов.
Министрнал тIимунийну, гьашину хьунтIий дур цаппара дахханашивуртту ятту ябаврин кумаграл чулуха. Масалдаран, гьарза бувантIий бур ца тта ябавринсса субсидияртту, кумаг буван най бур ппал даххавриву ва ялагу, ялунчIил цIусса субсидияртту буллан най бур сагъсса ятту биххан буллуминнан.

Абзагьир ХIусайновлул пикрилий, ми чараннайну бюхъантIий бур ятту ябаву «ххютула» дуккан дуван, цанчирча, биххан буллусса яттил дикI сияхIрайн ласавантIий дур «Меркурий» тIисса системалуву ва буллантIий бур ветеринариялул сертификация.
ДР-лул Россельхознадзорданул управлениялул каялувчинал хъиривчу ХIажимахIаммад Азаевлул дакIнийн дуртунни Дунияллул халкьуннал дянивсса эпизоотикалул бюрорал тIалавшиннарду. Мунал тIимунийну, республикалий аттес­тацияртту дурну дур ятту ябуллалисса 6 идаралий, миннувух бур Ираннайн дикI да­ххаймигу. Ялагу 2 идара лабивзун бур, цалла яттил дикI Аьрабусттаннал Эмиратирттайн да­ххан ихтияр дулаврил хIакъираву. Мукунна жущара бюхълай бур яттил дикI машай дуккан дуллан Аьрасатнал 33 региондалий.

Абзагьир ХIусайновлул бувсунни, ялунчIил ятту биххаву сертификациярттал дузал булларча, ятту ябаврин арцуйнусса кумаг буллан аьркиншиву.
Артем Здуновлул ДР-лул Минсельхозпродрайн тапшур бунни дикI ва дикIул сурсатру машай дуккан даврил сакиншинна дуван.