МахIаммад Аьвдуссаламовлуясса луттирал
соавторну ур жула лакку оьрчI

Бадрижамал Аьлиева
Боксер МахIаммад Аьвдуссаламовлуя къабавсса, хьхьичI спортсменнал карьералул хIисав ласлай, махъ, 2013-ку шинал ноябрь зуруй, Кубанал боксер Майк Переслущалсса иявриву хьусса захIматсса цIунцIияртту сававну, муния шинай шанийн агьсса жагьилсса спортсменнал цIуллу-сагъшиврул буруккин къабуллалисса, мунал кулпатрал оьр­му итталу къабувгьусса инсан, нажагьсса акъа, акъахьунссар. Вай гьантрай инстаграмравусса цила лажиндарай цIанихсса спортсменнал кулпат Баканай Аьвдуссаламовал баян бувунни цуппа цила ласная МахIаммад Аьвдуссаламовлуясса лу чичлай байбивхьушиву, ва ишираву цинма кумаг буллалишиву Сурхай Ссунгъуровлул.

Вай махъсса сайки арулла шинал мутталий шанийн агьсса, ка-ччан сукку дуван, ссихI дур­ккун, зума ахъан къахъанахъисса МахIаммадлул чIарату ти-шинмай къавхьусса Баканай хьунни дунияллул личIи-личIисса билаятир­ттай ялапар хъанахъи­сса, личIи-личIисса диннал ва миллатирттал хъаннинсса эбратну, хъамитайпалул цила ласнайн хаин къашаврил, букъаххаврил, бан-бит бакъа къаличIаврил, хъинмунийнсса умудрал вибуцIаврил ккаккияну. МахIаммадлул ва Баканайл лагмагу – ккаккияртту хьусса вайннал шанмагу душ.

— Ттул ххирасса подписчиктал. Анавар букканна зу нава лу чичлай байбихьушивриясса хаварданийну ххари буван. Ва ишираву ттун кумаг буллай ур Сурхай Ссунгъуров. Ва жул кулпатрая­сса лури, вай шиннардил мутталий жува бувхIумуниясса, жува къума бувми ва, кару итакъадаркьуна, жунма гихунмай бачинсса гужгу, хIалгу ххи бувсса иширттаясса. Бусан ччан бивкIунни жува бивтсса захIматсса ххуллуя, укун­ссара тагьарданувун багьсса ягу цивппа алши бакъултран ккалли буллалисса инсантуравун гихунмайгу хъинмунийнсса умудращал бачинсса гьавас ххи буваншиврул. Цаппараннаннив – цимурца, интернетраву чIалачIисса куццуй, бигьанма ва оьрчIи-чIюлуну бакъашиву чIаланшиврул. Зугу бацIияра жул чIарав, зулва комментариярттаву бусира ва луттираву зунма на ссая бувсун ччи­ссарив, ци кIицI лавгун ччиссарив. Лу бавххуну хьусса арцу тIайла дувантIиссар лихха-личча хьуну, мушакъатну ливчIсса спорт­сментуран кумагран ихIсандалул фондирттавун, мукунма спортраву хьусса цIунцIияртту сававну гъанминнацIа хьусса кулпатирттан кумагран, — тIий чичлай бур Баканай инстаграмраву.
ХIакьсса дустал оьний, захI­матний чIалан бикIай. Мукун га оьзрусса иширая шинайгу вайнная арх къавхьуминнавух ур, архсса Американаву ялапар хъанахъисса МахIаммадлул ва Баканайл кулпатрал ччянивасса дус, му билаятрай чIярусса шиннардий ялапар хъанахъисса жула лакку оьрчI, Ккурккуллал шяравасса МахIаммад Ссунгъуровлул арс Сурхай Ссунгъуровгу.
— Лу буккантIиссар кIива маз­рай. оьрус ва ингилис. Спортс­меннал оьрмулия, мунал бакIрачIан бувкIмуния бусласисса ва лу бикIантIиссар захIматсса тагьаруннивун багьсса инсантурансса мотивациялул пурмалийсса. Шиву ди­кIантIиссар спортсменнал гъан-маччаминнал, тренертурал, дустурал дакIнийнбичавурттугу. На хIарачат бав спонсортал ля­къин, дував издательствалущал­сса икьрал. Яла Голливудрай фильмгу ласунтIиссар, лякъинну мунилсса буллансса командагу. МахIаммадлуя тIурчан, ванан цанма цимурца дакIний бур, хъанахъимур бувчIлай ур, хьхьичIва хьусса ишру дакIнийн бичлай, цащава бюхъайсса куццуй хъярчру буллай ур. ЦIана жу датIлай ва чичлай буру аьркинсса информация, — тIий, архсса Американава вотсаправу чичлай ур хIакьсса дусшиву дуван кIулсса бусурманчу, зунтталчу Сурхай Ссунгъуров.