Мизитру тIитIинсса ихтияр дуллунни

[dropcap]М[/dropcap]изитру, килисарду ва динийсса цаймигу идарартту тIи­тIинсса ихтияр дуллалишиву баян бунни Роспотребнадзорданул Дагъусттаннаймур управлениялул хъунама Николай Павловлул, коронавирусрал азар дайщун дувавриха зузисса штабрал батIаврий.


П. Рамазанова
Ларгсса итникьини хьусса ва батIаврий каялувшиву дунни ДР-лул ХIукуматрал хъунама Артём Здуновлул. Ванал бувсунни гьантлия гьантлийн къулай хъанай душиву вирусрацIун дархIусса тагьар, мунияту хIаллицIух личIи- личIисса идарартту тIитIлай бушиву, цакуну циняв тIитIинсса чIунгу дучIан дурашиву, мунияту, мизитру зузи бан ихтияр дулурчагу, хъинну ялув бавцIуну бикIан аьркиншиву, мизитир­ттаву, чара бакъа дезинфекция дуваврицIун, чаклий кувнначIан кув гъанну бацIангу къадагъа душиву. Мукунма тIалав бувну бур мизитирттавун маскарду ларххун бучIаву, циняр санитар кьараллугу дуруччаву.

«Жува дахьва вирусрал балаллува буклай буру, цIу­ницIагу мунил хъапалухьхьун къабирияншиврул, санитар тIалавшиннардугу дуручлай, дурсса къадагъагу кьамулну, мугъаятну къуццу тIун аьркин­ссару, мизитирттавунгу, ккучунну дурну, цакуну чIявусса агьали батIлан аьркиншиву дакъар цалсса, ссавурданий сантирайн багьантIиссару»- увкунни Николай Павловлул.