Цал-дунугу Сулакьуллал каньон ккаркманан му тачIав хъамакъаритантIиссар. Ва хъанай дур республикалул ххуйшивурттавасса, оьрусрай учин, Дагъусттаннал достопримечательностирдавасса ца.
Каньондалул куртIшиву дур 1920 метра, лахъишиву – 53 километра. Ва хъанахъиссар дунияллийсса яла куртIми каньоннавасса ца. Масалдаран, США-навусса Аризона штатрайсса Хъунна каньондалияр ва куртIссар 120 метралул. КуртIшиврул чулуха Сулакьуллал каньон лувну дур анжагъ Котауси тIисса Перулийсса каньондалияр (ванил куртIшиву – 3 535 метра).
Гьарца шинал Сулакьуллал каньондалийн бияйссар азарунния ливчусса туристътал. Миккун ччима инсаннаща бюхълай бур, экскурсия заказ бувну, республикалул хъуншагьрулул дязанниява гиднащал ачингу, бюхълай бур цувалу, цалва машиналий аьрххилий уккангу. Цукун ачирчагу, укунсса аьрххирдан инсаннал чIярумур чIумал харж дувай щалла кьини: Дубки поселокрайнгу ивну, Сулакьуллал каньондалийнгу ивну, Сулакь неххачIасса «смотровой майданнив» суратругу рирщуну, ЧиркIайннал ГЭС-рачIагу аглан хьуну, лагмасса дунияллий тамаша буван.
Агарда зун зулла отпускрал чIумал хьхьирил зуманийсса, къундалийнгу агьну, чIер-чIертIисса бургъилусса игьалагаву къаххирахьурчан, дири буккияра Сулакьуллал каньондалийн – хасну миккур зуву хIасул хьунтIисса зува дунияллул бакIрай бусса кунмасса асар, лагмарагу, анжагъ зува ва ххаллилсса Аьрщи дакъа, цамур цичIар дакъасса кунмасса пикри. 1858-1959-ку шиннардий Аьрасатнавух уклай, шанма барз Ухссавнил Ккавкказнаву бувну, Сулакьуллал каньондалийнгу ивсса цIа дурксса чичу Александр Дюмал увкусса куццуйсса асарду бухIаншиврул: «…Аьрщарайгу уттуивхьуну, яру лакьав. Ттувунма му ппурттуву бувхсса зурзу-зуву аьрщарал къюкI ришлашавривух хIала бувхсса хханссия…».
