Барчаллагьрай бур щащар

Нурижат ласнал шакилданущал

Ххувшаву ларсун 75 шин хъанахъисса байран Ккуллал райондалий хьунадаркьунни та дяъвилул гьурттучитурал щахъаннивасса ацIния мукьуннил.

ХIакьинусса жула ихтилат вайннувасса цаннияр. Ваччиял шяравасса Муслимов Юнуслул щащар Муслимова Нурижат Кьадиаьлинал душ.


ХIажимурад ХIусайнов
Ва ванан щар хьуну бур, Юнуслул щарсса ахиратрахьхьун ларгун мукьах, 1970-ку шинал. Нурижат Юнуслун щар хьусса чIумал ванал къушлий бивкIун бур шанма душ. ца – аьпалу­хьхьун лавгмунил хьхьичIвама чувнацIасса ва кIива цалассагу (вайннувасса ца – республикалий ва мунил кьатIув цIа ларгсса хIакин-невропатолог Майя Юнусовна).

Нурижат цуппа 1-мур ЦIувкI­ратусса бур. Ванил чIярусса шинну дурссар Ваччавсса столовайлий цIигьурну зий. Ва даврий зуннин ванил бувккуну бивкIун бур кулинар шайсса курсру. Ванил сайки 40 шин дурну дур му даврий зий.
Юнус ур Ваччиял шярава­сса, 1922-ку шинал увсса. Дяъвилуву гьуртту шаврищалгу, гания махъгу аьралуннаву къуллугъ буллай, ванал аьмну хьуну диркIун дур 8 шин ва дачIи. Армиялия учIайхту, бувккуну бивкIун бур Дагъусттаннал Шяраваллил хозяйствалул институт. Хьуну ур гъаттарал хIакин. Зий ивкIссар Ккуллал райондалий цала касмулий. Юнус ивкIуну ур 2004-ку шинал.
ХIайп учинсса зат ци бур учирча, Нурижатлун, укун мяърипатрал бувцIусса хъамитайпалун, Аллагьнал оьрчI-душ буллуну бакъар.
Нава буллалисса ихтилат ва иширачIату архну чIаларчагу, шикку на ца укунсса затгу бусанна. На 40 шин дурссар Дарбантлив яхъанай. Нава яхъана­хъисса кIанттая (га бия азирбижан агьлу яхъанахъисса махIла) арх бакъасса ттучандалийн лавгсса чIумал, гивун уххайхтува, очерданий бавцIусса хъами ти-шинмай хьуну, хьхьичIалу тIитIайва. Га цурдагу СССР ду­сса чIун дия. ХIасил, азирбижаннал миллатрал хъаннил, чIивисса икIу, хъунасса икIу, адамина очерданий ацIан къаитайва. Нурижатгу хъинну хIурмат буллай бивкIссар цила ласнал Юнуслул.
На Лаккуйн яхъанан увкIсса шиналва кIул хьуссияв Нурижатлущал. Га дия 2013-ку шиналсса Ххувшаврил кьини. Нурижатлул авадансса ссупра тIив­тIуну бия цила лас дакIнин утан бувкIминнан. Гания шинмайгу гьарца шинах тикрал шай гава мажлис.
Уттигъанну Нурижатлул ттухь, маслихIат бансса иш бурча, ухьхьу куна. Ци бия учирча, ванил бувсуна цин хъунма­сса барчаллагь учин ччай бушиву Аьрасатнал Президент Владимир Путиннухь. Циван учирча, укун архну зунттаву яхъанахъи­сса Хъун дяъвилул гьурттучинал щащар дакIния гьан къабивтун, 75 азарда къуруш арцул дуллушиврийн бувну. Вайннулла ялун Ккуллал райондалул бакIчи Рамазанов Шамиллулгу дуллунни тIива Ххувшаврил байрандалийн 5 азарда къуруш.
На тIайланма бувсъссия ттущава Путиннуйн ванил тIисса барчаллагь баян бан къахьуншиву. Амма нава зузисса «Илчи» кказитрайхчин барчаллагь тIий бушиву чIявуссаннан кIул бан бюхъаншиву.
Адаминал ххуллийсса къириятрал заллусса хъамитайпа Нурижатлухь жувагу барчаллагь чинну ва цал уттигу барча данну Ххувшаврил байран.