Ххуттава къабувккун ларгунни экзамен

Июль зурул 13-нний ЦIуссалакрал райондалул выпускниктурал дуллунни физикалул ва тарихрал Цасса паччахIлугърал экзаменну.


ЦIуссалакрал райондалул КIулшиву дулаврил управлениялул хъунмур Светлана Къудаевал бувсунни гьашину райондалий тарихрал ЕГЭ язи дургьушиву 24 выпускникнал ва физикалул­сса 7-ннал.
«Экзаменну дуллай бивкIсса 281-мур пунктрай Роспотребнадзорданул ккаккан дурсса цинярдагу тIалавшиннардайн бувну зий бивкIру. Экзаменнайн наниминнал чурххал температура ххал даву дакъассагу, гьурттучитал маскардал ва катIрал, хIачIайсса щинал щаллу бувссар. Мукунма, райондалул бакIчи ХIажи Айдиевлул дузал бунну медициналул маскардал.

Выпускниктурал мюхчаншиву дуруччаву мурадрай, сакин бувну буссия оьрчIру экзамендалийн буцинсса график. Экзамендалийн оьрчIру биян буллай буссия ссят 8:15 хьусса чIумуя байбивхьуну 9:40 хьуннин. Дайдирхьуссар экзамен ссят 10-нний. ОьрчIру, кувнная кув арх буцан бувну, щябивтун буссия мукьва аудиториялуву. Экзамендалул даву ххал дигьин ЦIуссалакрал райондалийн бувкIун буссия ПаччахIлугърал экзаменну дулаврил комиссиялул члентал ва жяматийсса ялув бацIулт. Экзаменну ларгунни ххуттава къабувккун, низам лиян къадурну», — тIий, буслай бур Светлана Рамазановна.

Тарихрал экзамендалун кка­ккан бувсса яла лагьмур бур 32 балл, физикалул т1урча – 36 балл. Вайксса баллу къалавсми выпускниктал бюхъайссар вузирдавун кьамул къабангу.
Июль зурул 27-нний кIул хьунтIиссар экзаменнал хIасиллу.

Читайте также: