[dropcap]И[/dropcap]юньдалул 24-нний Владимир Путин лаивзунни аьрасатлувтурайн. Цалва ихтилатрал цалчинмур бутIа мунал хас бувунни коронавирусран, кIилчинмур – социал кумагирттан ва цIушиннардан.
Ихтилат бунни Конституциялуву дахханашивуртту даврил хIакъиравугу, аьрасатлувтурахь тавакъю бунни чIурду булавривух гьуртту хьун.
Лаизаву лахъи ларгунни 50 минутIрайсса. Ахирданий Путиннул бувсунни дакI дарцIуну ушиву, жува циняв ца хьуну, цинярдагу захIматшивуртту духлаган дуван бюхъаншиврий.
Владимир Путиннул тIимунийну, 2021 шинал январьданул 1-нния тIайла хьуну, инсантурал доходирттайнсса налогирттал ставка ххи буллай бур 13 процентрая 15 процентрайн биянцIа, шинал мутталий ласайсса харж цачIу 5 миллиондалияр ххишала хъанай бухьурча. Налог ласлантIий бур ми 5 млн. къурушраяр ххишалами арцуя. Ми налограл арцу нантIий дур захIматну къашавайсса оьрчI-бакI хъин буван.
Владимир Путиннул бувсунни зукъазисса инсантурансса напакьартту лахъ хьунтIишиву гьашину июльданийгу, августрайгу. Нинугу, ппугу давурттацIа хьусса кулпатирттал оьрчIал ласавантIиссар 3 азарда къуруш гьарцаннал.
Гьарца 16 шин хьуннинсса оьрчIан 10 азарда къуруш ккаккан дурну дур. Билаятрал Президентнал бусаврийну, июньдалий миксса арцу ларсминнал микссара ласунтIий бур июльданийгу. МиннуцIун, даву дакъа ливчIминнансса лахъ бувсса напакьартту ишлану бикIантIий бур июльданийгу, августрайгу.
Коронавирусрал инфекциялул вакциналул агьамшивугу кIицI дурну, АьФ-лул Президентнал тIайланнасса эфирдануву бувсунни жура эпидемия хIурхIа хьунмур дуллай бушиву. Владимир Путиннул тIимунийну, жува хIарачат буллай буру азар духлаган дуван, амма вирусрая ттигу-шилагу нигьачIаву дур. Вакцина буллай байбишиннин аьркинни хъинну мугъаятну бикIан.
Президент Владимир Путиннул тапшур бунни «коронавирусрал стимулирующие выплатартту ва доплатартту» дуллан сентябрьданул 15-ннийнин. Мунал дакIнийн бувтунни ми бушиву педагогтал, психологтал, медициналул зузалт, оьрчIал къатраву, хъунив хьуминнал къатраву, интернатирттай зузисса.
В. Путиннул тIимунийну, хIукму кьамул бувну бур цинярда стимулирующие выплатартту сахла дуван духтуртуран ттигу 2 зуруйсса, миннуя къадугьайссар налогру, ми цирдагу хIисавравун ласайссар отпускирдайнсса арцул хIиса-китав дайни. Ми цинярдагу выплатартту щурун диркIун дур апрельданул 15-нния июльданул 15-ннийнин.
Индира Шалласуева
