[dropcap]Т[/dropcap]Iайлашиву ва тIайла дакъашиву мудангу архIал нанисса затру дур. Гьай-гьай, тIайла дувара ттул чулухуннайсса тIайлашиву тIий,
чIявуну жунма «талангу» багьай. Амма, чIявумур чIумаллив, му «талатаву» ссайнчIав къадурккун личIлачIисса ишру хъанан бикIай.
Коронавирус сававну ссуссукьу хьусса культуралул инсантурах ябитияра тIисса билаятрал Президентнал ихтилат бия телевизорданувух. ТIайлар, аьркинни минналми давурттугу хIукуматрал кумаг баврил сияхIрайн ласун. Амма ттул хIакьинусса ихтилат ттула касмулиятур.
Циван учирча, кказит-журналлай зузисса ва зунттаву яхъанахъисса СМИ-лул зузалт кумаг бан аьркиншиврул сияхIрайн тачIаввагу багьлай бакъар. Гьашину ттул 5 шин хьунни, 2014-ку шинал Дагъусттаннал Халкьуннал Мажлисрал кьамул дурсса «О мерах социальной поддержки граждан в сельской местности и поселках городского типа» тIисса Закондалийн бувну, СМИ-лул даврийсса корреспондентнал касмугу му кумаг буллалиминнал сияхIрайн дутара тIий, чагъарду чичлай. Му куклушин дур педагогтуран, медиктуран, культуралул зузалтран, социал зузалтран ва ветеринариялул пишакартуран ккаккан дурну. ТтучIа бур нава чивчусса ва ттучIанма бувкIсса чагъардал щаллусса папка хIасул хьуну. Чивчуссия Дагъусттаннал Печатрал ва информациялул министерствалийнгу, Культуралул министерствалийнгу ва цайми кIанттурдайнгу.
Шиккува кIицI бан, ва на бусласисса закондалийн бувну, шяраваллил кIанай яхъанахъисса ялув кIицI бувсса пишакартуран гьарца зуруй тIювалул куклушиндаран 1000 къуруш дуллай бур. Ттун захIматрал ветеран ушаврийн бувну дулай 131 къуруш.
ХIасил, махъва-махъ Культуралул министерствалия бувкIсса, дукIусса июль зуруйсса, чагъарданий бур культуралул инсантурал сияхIрай корреспондентнал касму дакъашиву буслай. Ттунгу бувчIунни вания гихунмайсса тамахIрая нава махIрум хъанахъишиву.
Ва на гьаз буллалисса масъала такну ттула чулуха буслай ухьурчагу, на кунмасса СМИ-лул пишакартал Дагъусттаннал зунттаву цаймигу буссар.
Ялагу ттунма къабувчIайсса зат ци бур учирча, СМИ-лул зузалтран дулай «Заслуженный работник культуры» тIисса хIурматрал цIа. Амма жувами бусса буру къакультуралул зузалт. Бакъаривла махIаттал хьунсса иш?!
ХIажимурад ХIусайнов
