[dropcap]Ж[/dropcap]улва оьрмулувун цIуххавххунна ххярххунни коронавирусрал азар. ЧIяйннал шяравасса Аьбдуллаев АхIмадлул кулпатрава шама инсан ур ва вирусращал талай.
Цува АхIмад зий ур Дагъусттаннал Урологиялул цIуцIавуртту хъин дайсса центрданий – шикку цIана хъин буллай бур коронавирус дирсса къашайшалт. Ванал кулпат Аьбдуллаева ПатIимат зий бур МахIачкъалаливсса яруннал азардал азарханалий хъунама хIакиннал хъиривчуну. ЦIана шиккугу хъин буллай бур коронавирусрал цIуцIаву дирсса къашайшалт.
ХIакьину ПатIимат бур хъунама хIакиннал буржру биттур буллай. Вайннал арс Аьбдуллаев Мурад лор-хIакин ур, зий ур Москавлив муххал ххуллул азарханалий, коронавирусрал цIуцIаву дирми хъин буллай. Ванахь барчаллагь тIисса инсанталгу чансса бакъар.
ЧIяйннал шяравасса МахIаммадов Жяъпар Павеллул арс хирург ур. Вагу зий ур Москавлив, Вишневскийл цIанийсса госпитальданий, вара цIуцIаврил къашайшалт хъин буллай. Зий ур гьантлун 12 ссятрай. Жяъпардул хъин бувсса, ванахь барчаллагь тIисса инсанталгу чансса бакъар.
ХIажимурад ХIусайновл
