«Агана зун кIулну бивкIссания вай махъсса зурдардий азарханардайсса къашайшалтрал бакIрачIан букIлакIимур, зу, цукунчIав ххуттава къабувккун,
цIакьну низам дурурччуну, зулва зува буручлай, шаппа бавцIуну бикIантIиссия», — тIий, буслай бур коронавирусрал инфекция дусса къашайшалт хъин буллай бивкIсса «РЖД- Медицина» (Муххал ххуллул) азарханалул хIакинтал.
Имара Саидова
Республикалий пневмония дусса къашайшалт гьарза хъанай байбивхьуния шинмай анаварсса мутталий хIадур бувну буссия ва азарханагу коронавирусрал инфекция дусса къашайшалт кьамул буллан. Вай гьантрай шичча итабавкьунни хъин бувсса махъва-махъсса къашайшала. Къашайшалт чан шаврийн бувну, утти ва клиникалул хIакинтал зун бивкIунни цала хьхьичIарасса низамрай.
Шикку захIматсса кьини лахълай барз ххишалагу бунни хирургиялул отделениялул каялувчинал бигарду биттур буллалисса КIулушацIрал шяравасса хIакин ХIажиев МахIаммад Шамиллул арснал.
— Май зурул 1-нния шинмай жул клиникалул хIакинтал, мукьва бригадалийх бавчIуну, цалва ужагъру, кулпатру кьабивтун, шиккува гьантта бикIлай, кIул дакъасса азар ялун дирсса къашайшалт хъин буллай, зий бивкIссар. Буниялагу, хъинну нигьачIаву дусса тагьар хIасул хьуну дия республикалий. Къашайшалт хъин буллансса азарханарду ва хIакинтал биял къахъанай, жучIава буцири медициналул клиникартту кумагран бувккун бия. Зурул мутталий жун ккавкмур тачIав щинчIав ккаккан нясив къахьуннав. Коронавирусрал инфекциялул азар сававну, жуятува личIи хьунни тамансса гъан-маччами, дустал ва архIал зий бивкIми. ХIасил, бакъахьунссар цавагу кулпат ва азарданул щавщи биян къабувсса. НигьачIаву дусса инфекция ппив хьун къаритаву мурадрайсса хъинсса дарсну хьунни ва мунищал талай бивкIсса хIакинтуран ва медсестрахъан. Бала-мусиват хьусса цIуцIаву цIунилгу махъуннай зана къахьуншиврул, уттигу цахъис хIарачат бувну, зулва зува бурувччуну бикIияра. Гьашинусса шиналсса инт жунна цинявннан тачIав хъама къаританссар. Бюхттулсса Ххувшаврил 75 шинал юбилей хьунадакьин хIадур хъанахъисса инсантурал хияллу бяливчIунни.
ХIакьину на дакIнихтуну барчаллагь учин ччай ура, цала оьрмурдан нигьачIаву дусса кIулну бунагу, ва захIматсса цIуцIаврищал талай, инсантурал оьрмурду ххассал буллай бивкIсса жула азарханалул цинявппагу хIакинтурахь. ЛичIинува кIицI лаган ччай ура азархана къашайшалт хъин буллансса оборудованиялул, дарурттал дузал бувсса ва шиккусса хIакинтурал мюхчаншиву дуруччаву мурадрай гьарца аьркинмунил щаллу бувсса ЖДБ-лул хъунама хIакин Шамил МахIаммадовлул цIа. Шамил МахIаммадрасулович, тай цалчинсса гьантрая айивхьуну, хIакьинусса кьининин яла нигьачIаву думур зоналий жущал архIал зий ивкIссар. Мукунма кIицI лаган ччай бур, щала дунияллийн вас-ццах багьсса чIумал, махъаллил къавхьуну, жущал архIал буххаву дакъа зий бивкIсса хъунмур медсестра, ХьурукIратусса ХIажиева Хамисгу. Гьай-гьай, жуннияргу кIилийну захIматри хъамитайпалун, оьрчIругу, кулпатгу цахунма цивппа бивчуну, зун. ХIакинтуралгу, техперсоналданулгу уттара дурсса хьхьурду инсантурал оьрмурду ххассал баврил цIанийссар. Ва бур жул даврил бурж, — тIий ур МахIаммад.
