Коронавирус тIисса рахIму бакъасса мугьалттул щатIи жул шяравунгу къавщуну къаливчIунни: чIирисса жул КIямашрал шяравасса 4-5 инсан оьрмулуцIа хьунни.
Миннавасса цану бур жул ххаллилсса, гьарца иширавугу, давривугу бювхъусса, гъан-маччанащалгу, щарнил жяматращалгу бавкьусса Загьрани. Ва буссия лакку мазгу, Лакку кIанугу ххирасса инсан.
Ххирар жун зунттурдугу,
Лагару шяравунгу,
Лакку мазрай нацIуну,
Шаппагу гъалгъа бару.
Вай ххару чивчуссия Загьранил ттул арснал оьрчIан, Лакрал жагьилтурал ккурандалул баян бувсса конкурсрайн гьан бан.
Байсса гъалгъа лакку мазрай бувара, оьрчIащал шаппа лакку мазрай гъалгъа тIутIира тIий бикIайва, аьпабиву. Ттуярва чIивисса бунугу, ванихь цIухлай бикIайссияв лакку мазрайнсса таржума. Утти щихь цIухлава, Загьраний? Гьарца кьини кIюрххил телефондалийн «Бивзрув, бурув, цукун буру» тIий бучIайсса вил махъругу утти бухлавгунни. Вил ххуйсса, тIааьнсса чIугу къабаяй утти жун. Ци банссар, Заннал чичрулун цичIав бан къашай жущава. Инава бувмунин лавхьхьусса жуща вин цичIав бангу къавхьунни.
Алжаннул хIурулъэнтуравух бивзун лякъиннав ина. Вищал хавар бусаван, вил гьаттайн бучIаванну.
Аьшура АхIмадова
