Юрий Чайкал ва Владимир Васильевлул ххал диргьунни эпидемиологиялул тагьар

[dropcap]М[/dropcap]айрал 27-нний АьФ-лул Президентнал Ухссавнил Ккавкказуллал федерал округрайсса вакил Юрий Чайкал ва ДР-лул БакIчи Владимир Васильевлул телефондалувухсса ихтилатраву ххалдиргьунни Да­гъусттаннайсса эпидемиологиялул тагьар.

Миннал бусаврийну, цIанасса ппурттуву Дагъусттаннал, коронавирусрал инфекциялул къашавайми хIисавну, СКФО-рай 1-мур кIану ва АьФ-лул субъектирдаву 5-мур кIану бугьлай бур. Юрий Чайкал Владимир Васильевлухь цIувххунни Президентнал тапшурлугъру бартдигьаврил хIакъираву.
Полпреднал Дагъусттаннал БакIчинахь бувсунни цалва Аппаратрайн дукIлай душиву инсантурал лабизавуртту: МахIачкъалалия, Хасавюртлия, Къизлардая, Буйнакскалия, Дарбантлия ва мукунна шяраваллаватугу. Вас-ццахлийсса сигналлу дуркIун дур Тарумовкаллал райондалийсса Таловкаллал шяравату, Къизилюртуллал райондалийсса Киров-аул шяравату, Губденная, Бущихъиял райондалийсса ТIулухиял шяравату. Миккусса инсантал буслай бу­сса бур диагностикалунсса тестру диялну дакъашиву, азарханардай койкарду биялну бакъашиврийну чIявусса инсантал литIлай бушиву.
«Коронавирусрал инфекция ппив шаву сававну республикалул цIуллушиву дуруччаврил идарарттай ашкара хьуну дур цаппара диялдакъашивуртту. ЖучIан бувкIунни азарханардайгу инсантурайн инфекция лархъсса ишру хьушивриясса хаварду. Укунсса ишру хьун битан къабучIиссар», — увкунни Юрий Чайкал.
Владимир Васильевлул Президентнал вакилнахь бувсунни муниципалитетирттай тагьар цалий дацIан дансса чаранну лявкъушиву. Мунал тIимунийну, цаппара масъалартту дузал бувну бур, ливчIминнул ялувацIаву дуллай ур Республикалул каялувчи.