ХIакинтурайн икрамрай буру

Муслимат Даудова

[dropcap]Щ[/dropcap]аллагу дунияллийх коронавирусрал пандемия ппив хьусса, халкьуннайх кьини дурксса чIумул цал ттигу мяйжан бунни медициналул зузалал пиша яла чумартмур ва бусравмур бушиву.

Дунияллул халкьуннал цал архIал ник рирщунни хIакинтурал хьхьичI. Мяйжаннугу, ци дуссар инсаннал цIуллу-сагъшивруяр хьхьичIунсса, ци дуссар къашавайнан бувсса кумаграяр чирисса. ЦIунилва-цIунил буслан ччай бур ва захIматсса чIумуву, захIматсса шартIирдай, хьхьу-кьини къаувкуну, зий, къучагъшиву ккаккан дурсса жула медициналул зузалтрая. Аьрасатнал шагьрурдаясса кумаг бияннин, вайннал хъуннасса хъар лархъссар, хьхьу-кьини къаувкуну, ва лавмартсса азаруннищал талай. Шардалугу кьариртун, «ятIул зонардай» зий. ЦIубутIуй цивппа мюхчан хьунмунилвагу дузалну бакъа, чIявуми хIакинтал цивппагу къашай хьунни.


Андриана Аьбдуллаева
ЦIанасса ттул ихтилат шагьрулул 1-мур азарханалул хIакин, Ккурккуллал шяравасса Муслимат Даудоваяр. Дахьра 6 шин хьуну дур Муслиматлул, институтгу къуртал бувну, зий. Амма ва чIирисса чIумул дянив ванил канилух мадара даву дурккун дур. 2014-ку шинал Да­гъусттаннал медициналул университетрал педиатриялул факультетгу къуртал бувну, Муслимат був­ххун бур Санкт-Петербургливсса Кировлул цIанийсса аьралуннал-медициналул академиялул ординатуралувун. 2017-ку шинал Санкт-Петербургуллал педиатриялул академиялуву бувккуну бур ульт­развуковой диагностикалул курсругу. Цила пиша ххуйну лахьхьин­сса гъирарал, архIала зий бивкIун бур 19-мур оьрчIал поликлиникалий ва Аьрали медициналул академиялул оьрчIал азардал клиникалий. 2018-ку шинал, ультразвуковой диагностикалул хIакин хIисаврай, Муслимат зун бивкIун бур Санкт-Петербургуллал 62-мур поликлиникалий. Шиккува бусан, Санкт-Петербургуллал клиникалий зий уссар отоларингологнал пиша язи бувгьусса ванил уссу ХIажимурадгу.

Муслиматлул ва ванил уссил, чIявуми вайннал ссурахъавралгу хIакиннал пиша язи бувгьуну бур чIярусса шиннардий Н.Кураевлул цIанийсса оьрчIал азарханалул реанимациялул отделениялий зузисса цала ниттирссу, буттарссу, Дагъусттаннал лайкь хьусса хIакин АьтIикат Гарайхановал шаттирдайх лавгун. ХIакьинугу цалла давриву ва гьарица ишираву вайннал ванищал маслихIат ккаккай.
Ларгсса шинал Муслимат зана хьуну бур Дагъусттаннайн. Зун бивкIун бур шагьрулул 1-мур азарханалий ультразвуковой диагностикалул хIакинну ва «Целитель» клиникалий оьрчIал хIакинну. Республикалий коронавирусрал инфекция ппив хьу­сса чIумал вагу, чIявусса цайми хIакинтал кунма, «ятIул зоналий» зун бувкIун бур.
— Ттула коллегахъащал на азарханалийва яхъанай бивкIра. Хьхьу-кьини къаувкуну, жуйн оьвчайва инфекциялуцIун дархIуну хронический азарду оьлуркъусса захIматсса къашайшалтрачIан ульт­развукрал диагностика дан. Зий бивкIру сменардай – 20 гьантлий ца, яла гамур. ЦIубутIуй хъинну захIматну бия. Нех дирхьуну къашайшалт бувцуну букIлай бия, гьантлун 100-120 инсан учIайва, ми уттубишин бан­сса кIанттурду биял хъанай бакъая. ЧIявусса литIлай бия. ХIакьину мукссара захIматсса тагьарданий чIалай къаивкIсса къашайшала, гьунттийнин цакуну реанимациялувун агьайва.

ХIакинтал, ка хъирив къалаллай, бан-бит бухлавгун бия. ЗахIматсса къашайшалт чIалай, ми канища буклакаву бухIан къахъанай, медициналул зузалт хъювусул буклай, психологнайн оьвчин багьсса кIанттурдугума хьуна. Му ппурттуву жун ххуйсса кумаг хьуна студентътурая-волонтертурая. Вайннал кьянкьа дурна. Ва ялагу, дурксса кьинилул зузалтрал хIал чIалачIи бувна. Ттун асар хьуна утти­нин, бивзрув-бурув куну, чIарах лаглай бивкIсса жула зузалт, архIал канай-хIачIлай, архIал уттубихьлай, ца кулпат кунма, цаннан ца гъан шаву, цачIун шаву, — буслай бур Муслимат.
Ва июнь зурул ахирданийнин вава цила пострай зунтIий бур. ЦIана шагьрулул 1-мур азарханалийсса тагьар мадара къулай хьуну дур. Медперсонал аьркинмунил дузалну бур. Умуд бур къашайшалт ччясса чIумуй, хъин хьуну, цала-цала ичIунмай зана бикIанссар, хIакинтурангу цахъи куклушиву хьунссар тIисса.