[dropcap]И[/dropcap]юньдалул 20-нний ДР-лул ХIукуматрал Председатель Артем Здунов кIул хьунни МахIачкъалалив Туберкулезрал диспансер буллалисса давурттащал. Ва бур 320 инсаннансса кIану бусса диспансер.
ХIасан Аьдилов
Премьер-министрнал бусаврийну, диспансерданул къатри дикIантIиссар 3 зивулийсса. Микку дикIантIий дур диагностикалул отделение ва къашавайми кьамул бай къатта, гьутрурдал, хирургиялул ва оьрчIал отделенияртту. ЦIанасса ппурттуву микку зий ур 50 инсан, 5 техника. Байбивхьуну бур виваллил давуртту дуллай.
Дур захIматшивурттугу.
ДР-лул ХIукуматрал Председательнал хъиривчу Инсап Хайрулиннул тIимунийну, дахханашивуртту дуван аьркинну дур вентиляциярттал, щин дуцаврил ва ишла дурсса щин экьирутIаврил сетирдаву. ЗахIматшиву дикIантIий дур документру хьхьичIма подрядчикнал ттиманайн тапшур бавриву.
Артем Здуновлул кIиягу подрядчикнайн тапшур бунни му масъала ччясса мутталий дузал буван. Ванал кIицI бунни давуртту лахъи лаган дитан цукунчIав къабучIишиву, дюъгу дирхьунни, агарда аьркин хьурча, му масъала чулийн буккан буван хасъсса органнайн оьвчинтIишиву.
