Хъунмасса Буттал кIанттул цIанийсса дяъвилий Ккуллал шяравату гьуртту хьуну ур 423 чув-адамина. Миннава 236 чув гьурттучитурая дяъвилия зана къавхьуну ур. Зана хьусса 197 вирттавраватугу Ххувшаврил байрандалул 75 шин хьунадакьин цаягу ливчIун акъар.
Цуманал бакIрачIан ци бувкIхьурчангу, вирттаврал цIардугу, миннал оьрмулул кьадаргу бусраврай ябуван, буржлувссару жува.
Ялув кIицI лавгсса 423-ннавасса, кIия хIаписарная бусан ччива ттун. КIиннаннагу цIагу дур ХIуса. КIиягу ур ЯтIул аьралуннал хIаписар. На вайнная ихтилат буванна Цалчинма ва КIилчинма ХIуса тIий.
Жула буттахъал аьдатрайн бувну кулпатраву цIуну увсса оьрчIан цIа цала тухумраясса, ягу цанма гъансса чиваркIуннаясса инсаннал цIа дизай. На кIицI лаглагисса кIа ца ХIусан цIа дирзун дирк1ун дур кIанал ниттил (Гуру ПатIил) – цила буттал буттал Дикьа-ХIусал цIа. Дикъа-ХIуса ивкIун ур Оьруснал ва Японнал дянив 1905 ку шинал хьусса дяъвилул гьурттучигу.
Цувагу лайкь хьуну ивкIун ур Георгийл ххачлил медалданун ва арцул кIамаймущалсса турданун. Бюхъай кIилчинма ХIусал цIагу вава къучагънан хас дурсса дикIангу. Буттахъал учала бурхха ца виричунал цIа ацIа чуматртнан дизан лайкьссар тIисса.
Цалчинма Ибрагьимов ХIуса увну ур Ачу-Ибрагьиннул ва Аттал кулпатраву 1907-ку шинал. Ибрагьиннул ва Аттал аьрайн тIайла бурккун бур мукьа арс: ХIуса, Муса, МахIаммад, Рамазан. Ца Рамазан зана хьуну ур аьрая, мугу чулахъ хьуну. ХIусал, Мусал, МахIаммадлул Ватандалухлу жанну харж дурну дур. Вайннавту хъунама ХIуса гьуртту хьуну ур Финнащалсса дяъвилийгу, яла немецнащалсса дяъвилийгу. Ва ивкIун ур кадровый хIаписар. Дяъви хьунабавкьуну бур Днепр неххай, Киевуллал аьралий округрай, капитаннал чиндалуву. Ва ивкIун ур га чIумал бахьттагьалтрал батальондалул командирну. Муния махъ полковникнал чиндалийн лавхъун ур. Талай ивкIун ур Брянскаллал фронтрал 13-мур армиялул 894-чинмур битултрал полкрал командирну. Ванал виричушиврия чивчуну бур маршал Бирюзовлул «Суровые годы» тIисса, СталинградрачIасса дяъвилиясса цала луттирай.Ва чичлай ур: «Подполковникнан ХIуса Ибрагьимовлун 1942-ку шинал декабрь зуруй Сталинград буручлачисса дяъвилий дурсса къучагъшиврухлу дуллуну диркIссар Лениннул цIанийсса орден. Ва мукуна ккаккан увну ивкIссар фронтрал командованиялул СССР-данул виричунал цIанин лайкьну ушиву». ХIуса Ибрагьимовлул 1942-43-ку шиннардий дурсса виричушивурттая чичлай ур ванащал талай ивкIсса дяъвилул гьалмахчу, махъ къуллугъ кьабивтсса полковник Серов Степан Серовгу: «Полкрал командир полковник ХIуса Ибрагьимов ганиннин дирсса захIматсса щаву сававну, августрал 8-нний 1943-ку шинал госпитальданий къуртал хьуна», — тIий.
Духьунссия ванал цала къучагъиврун лархьхьусса дяъвилул наградарттугу. Ванал бивкIун бия Наташа тIисса аьсатIин миллатраясса кулпат. Ванал душ Аза ниттил лахъиндалуч1а АьсатIиннаву хъунма хьуссар. Арс Герман, буттал лахъиндалучIа Ккуллал шяраву хъунагу хьуну, тарбиягу хьуну хъунмасса хIурматрай уссия. Цувагу цаппара шиннардил хьхьичI аьпалухьхьун лавгунни. Ванал бур буттан цIасса арсгу, ниттин цIасса душгу.
КIилчинма ХIуса ХIажикьурбанов увну ур 1920-ку шинал ХIажикьурбаннул ва ПатIил (Гуру ПатIил) кулпатраву. ХIусал бутта ХIажикьурбан, Кьиблалул Дагъусттаннай баргъ лавчIун, ХIусан 9 шин хьусса чIумал аьпалул хьуну ур. Ванал нину Гуру ПатIи, га чIумалсса зунттавусса хъамитайпарттаву цалчинсса коммунист, Дагъусттаннал обком ВКП(б)-лул членну бувчIуну бивкIсса цинявннан бусравсса хъамитайпа бивкIссар. Ккуллал шяраву арулва класс къуртал байхту, пионертурал вожатый шайсса курсругу бувккуну, Ккуллал школалий пионертурал вожатыйну зий ивкIун ур ХIуса. Яла, 1939-ку шинал армиялийн увцуну, тIайла увккун ур Бакуйсса аьралий училищалуву дуклан. Дяъви байбивхьусса гьантрай ва гьан увну ивкIун ур Гуржиял Авчала тIисса шагьрулийн. Тикку ва цIуну армиялийн бувцусса оьрчIан аьрали низам лахьхьин дуллай ивкIун ур. Муния махъ, 1942-ку шинал, дяъви КъапкъазуллачIан бивсса чIумал, цала хушрай дявилийн лавгун ур. Новороссийск шагьрулучIасса къизгъинсса талатавриву дирну дур ванайн щаву. КIива зуруй Аьшттарханнай госпитальданий хъин хъанайгу ивкIун, яла лавгун ур ВоронежрачIасса дяъвилийн. Тикку ва лейтенантнал чиндалуву разведкалул роталул командирну ивкIун ур. Гьурттушинна дурну дур Днепр нех лахълахъисса захIматсса талатавриву. Балаклея тIисса Харковуллал чIаравсса шагьрулий дирну дур ХIусайн цIунилгу щаву. Му щаву хъин дуллай госпитальданий буван багьну бур мукьва барз. Щаву хъин шайхту, ХIуса ХIажикьурбанов ялагу, 1945-ку шинал апрель зурул байбихьулийнийн ияннин, талай ивкIун ур 2-мур Белорусснал фронтрал 47-мур армиялул 186-чинмур гвардиялул дивизиялуву битултрал батальондалул командирну. Одер нех лахълахъхисса талатавриву Цеден тIисса немецнал шагьрулучIа ХIусайн ялагу кIусса щаву дирну дур. Хъин хъанай ивкIун ур Бакуйсса аьралий госпитальданий 1945-ку шинал ахирданийнин. Ва махъра-махъсса талатавриву дурсса виричувшиврухлу ХIусан дуллуну дур 2-мур даражалул Суворовлул орден. ХIусал ялагу дур 4-ра орден: ЯтIул ЦIукул, ЯтIул Ттугълил ва кIира Буттал к1анттул цIанийсса дяъвилул.
Дяъвилия махъ ва ялагу аьралуннава мурахас къавхьуну ур. Полковникнал чиндалуву 1970-ку шинал къуллугъ къабитаннин Азирбижаннал виваллил иширттал министерствалий зий ивкIун ур. Ванал дур «Заслуженный работник МВД Азербайджана» тIисса хIурматрал цIагу.
Цала дяъвилия махъсса оьрмулуву ХIуса чара бакъа шинай кIийла-шамийла Ккулув къаивну къаикIайссия. Бакуйннал шагьрулийн аьрххи багьсса ккуличугу ваначIая ликкайсса. Ванан кIулну бикIайва Бакуй ялапар хъанахъисса сайки циняв лакрал кулпатру. Ванал цала кулпат Гъумучиял шяравасса Назимащал, хъунигу бувну, оьрмулул ххуллийн бивчуссар кIия арс ва ца душ. Хъунама арс Аслан ур философиялул элмурдал доктор. Дарс дихьлай ур Ломоносовлул цIанийсса Москавуллал университетраву.1996-ку шинал октябрь зуруй ХIуса аьпалул хьуссар. Цала бувсса аманатрайн бувну, увччуну уссар Ккуллал шяраву.
Укун уздансса, виричусса тарихрал ххару чивчусса цимиягу Хъун дяъвилул гьурттучи уссар жула жматирттал дянив. Цими шин тарихраву ккуру лагарчагу, жула ялун нанисса никиран вайннал цIарду дакIния гьан дитан къабучIиссар. Вайннал жухлура жанну дуллуссар. Жухлува талай бивкIссар. ТачIав дакIнияту къабуккантIиссар!
Рамазан МамМаев
ш. Ккул.
