Культуралул волонтертал

[dropcap]Д[/dropcap]агъусттаннал культуралул волонтертурал медициналулми волонтертущал архIал барча бунни жулла республикалул медициналул зузалт.


Бадрижамал Аьлиева
Медициналул зузалал кьинилул хьунийн волонтертурал асфальтрай мелданух дирхьусса «Барчаллагь жулва вирттавран» тIисса, Республикалул клиникалул азарханалул, Республикалул анаварсса медициналул кумаграл азарханалул ва Инфекциялул азардал, СПИД-ращалсса талатаврил ва профилактикалул центрданул хIаятирттаву дирхьусса суратирттал яру ва дакI ххари дуллай дия.
«Шикку кIяла хялатирттавусса вирттал зий буссар» тIисса граффитирал тIурча, чIюлу бувну бия МахIачкъала шагьрулул клиникалул азарханалул чIира.

Акциялул давривух, культуралул ва медициналул волонтертуращал архIал, гьуртту хьунни М. А. Жамаллул цIанийсса Дагъусттаннал художествалул училищалул ва Дизайнрал, экономикалул ва праволул техникумрал студентътал, «Оьрмулул декоратортал» тIисса социал-культуралул проектрал каялувчи Т. Темиров, МахIачкъала шагьрулул 28-мур ва 33-мур гимназиярттал дуклаки оьрчIру.