Кулпатри цIакьсса паччахIлугърал гьану

Ккуллал райондалий дайдирхьунни Конституциялий дахханашивуртту
дуллалисса чIурду булаву

Нину ниттин кIанай, бутта буттан кIанай акъасса кулпат – ливсса кулпатри

[dropcap]С[/dropcap]сал-унугу гужсса муттаэну увкма цIухлай, ссай рязину, ссай къарязину ура тIисса ч\умал, лякъай цува къаршину уклакимуния балжийну цичIав къакIулма.

Бакьин бавурттай къарязиру тIисса ца ххюя инсаннахь цIуххав, хасну ссаяту къарязину ура, цуми пунктир­ттал муттаэра куну. Цанналвагу мяълумну къабувсунни – бувагу якъабивтун тIий миннух, цува къарязишиву ссацIунссарив цанмавагу къакIулну тIий.


ПатIимат Рамазанова
[dropcap]Н[/dropcap]ава «Илчи» кказитрай оьрчIал темалуцIун лавчIсса инсан бухьувкун, ттун ххуй бивзунни 67-мур статьялий Аьрасатнал Федерациялул суверенитет дуруччаврицIун ххи бувсса пункт «ОьрчIру Аьрасатнал Федерациялул агьамсса хъусну хъанахъиссар» т\исса («Дети являются важнейшим достоянием Российской Федерации»). Вава пунктрай гихунмай бур паччахIлугърал бакIрайн ласласишиву оьрчIан гьарца чулуха итххявхсса инсантал хьунсса шартIру дузал даву: дуккавриву, спортраву – гьармуниву. Ва ялагу, нину-ппу бакъа, ургала акъа ливчIсса оьрчIру хъуни бувну, гьар аьркинмунил дузал бувну, чивун буккан буван.

КIилчинмур гурга (ттула ихтиварнал тIийкунсса хъалул гурга дакъар, гьа) ккуру ританна: 72-мур статьялуцIунсса бакьин баву («Брак как союз мужчины и женщины»). Дунияллий хIакьину сайки 29 билаятрай ихтиярду дуллуну ду­ссар чиваркIуннал чиваркIуннащалсса ташурду буллан, хъаннин – хъаннищал­сса. Мукунсса ташурду буваймигу инсанталли, мигур бурувччуну бикIан аьркин­сса тIисса Европанал парабакIу. Так Европанал бакъарча: дакIний бурив, Аьра­сатнал Президент Владимир Путиннул 2013 шинал балугъравун биян буваминнал дянив гомосексуализмалул пропаганда дуллалаврий къадагъа дишинсса закон цIакь дувайхту, кьатIаллил билаятирттайн яржа бакъа, жучIава Аьрасатнавусса оппозиция гьаз хьуну бивкIсса?

Сочилийсса Олимпиадалул ппурттуву гъургъазартту дулланну тIий ххуттава бук­лай бивкIсса? ТIайламур бусан, миллатрал кказитрай чичлангу, зумух ласланнагу ламусъсса тема дур ва. ПарабакIу ппив къабулланна, амма кIулнан кIулссар ва парабакIул кьанкь жучIара Дагъусттаннайгу танира ппив хьуну душиву. Жува Европагу бакъару, жунма Американая эбрат ласлан аьркиншингу дакъар (2013 шиналнин тайнначIагу ца тайпалул ташурдайн къадагъа дуссия). Бур ца тайпалул ташурду къакьамулсса цаймигу билаятру – Гуржиял, Латвиянал, Болгарнал, Молдавиянал конституцияртту.
Аьрасатнал Конституциялий ташу бувансса ихтияр так адаминахь ва хъамитайпалухь душиву цIакь дуваврицIун нагу цIакьну бакьлакьиссара. Ва ташулул институтри баххана хьун битан къааьркинсса – тачIаввагу.

Нину ниттин кIанай дакъасса, бутта буттан кIанай акъасса кулпат ливну лавгсса кулпатри, мукун­сса кулпатирттаву тарбия хъанахъисса оьрчIругу («ялув ттуккун», оьрчIру тарбия буван буцингу ихтияр дуллай бур­хха!) мяърипат оьрчIнийра аьйплу хьусса инсанталли. Му иширал тахсиркарталгу ми билаятирттал хъунимири. Авкьатсса паччахIлугърал политикагу дикIан аьркинссар мяърипатрал гьанурду цIакьлин бувгьусса.

Бакьин бавурттахлу чIу булаву, къабулаву гьарманал цала ишри, ттуйн багьай­сса иш бакъар тIий, биччибакъулну ацIаву – яла заралмурди. Аьрасатнал граждантал бухьувкун, Аьрасатнал Конституциялийн­сса дахханашиннардая бухьувкун ихтилат, я бучIир, я къабучIир тIисса тарап гьарманал дикIан аьркинни.