Хар-хавар бакъа ялун бивсса лухIи бала сававну, кIия-кIия ххаллилсса лаккучунацIа хьунни ООО «Дагестан» авиакомпания.
СУЛАЙМАННУЛ АРС РАМАЗАНОВ РОБЕРТ
Июнь зурул 4-нний, оьрмулул чагъираву, дунияллия лавгунни Хъусращиял шяравасса Сулайманнул ва Кьурбанкъизлул арс Роберт.
Увну ур Роберт 1970 шинал Каспийск шагьрулий. Хъусращиял шяраву школагу къуртал бувну, 1991 шинал дуклан увххун ур Краснокутскаллал Граждан авиациялул училищалувун. 1994-1999 шиннардий лехлай ивкIун ур кIилчинма пилотну «Авиалинии Дагестана» авиакомпаниялий. Муния шинай, жаваблувсса ва лавайсса квалификациялул пишакар хIисаврай, Роберт зий уссия «Аэросервис» ва «Дагестан» авиакомпаниярттал самолетирттал командирну.
Цалла даву ххирасса ва ххуйну кIулсса Роберт бусравну уссия архIал зузиминнан. Хъярч-махсара ххирасса, хIал бавкьусса, дакI-аьмал хъинсса Роберт ххирая дустуран ва щалагу щарнил жяматран.
ДакIнихтуну кьурчIишивугу кIидачIлай, жижара буллай буру ванал кулпатрахь, ниттихь, арснахь, душваврахь ва цинявппагу гъан-маччанахь. Нинугу, кулпатгу къума-банд лаган бувну, оьрчIругу ятинтал бувну, оьрмулул дязанний дунияллия лавгсса Робертлул рухI бигьаний дишиннав, алжаннул ххари аннав. Махъминнал оьрмурдай барачат бишиннав. Гъан-маччанангу дард духIансса ссавур диял хьуннав.
Хъусращиял жямат,
«Дагестан» авиакомпаниялул коллектив
РАЗАКЬЛУЛ АРС МУСИЕВ РИЗВАН
Июнь зурул 1-нний хар-хавар бакъа дунияллия лавгунни Ккуллал шяравасса Разакьлул арс Мусиев Ризван.
Ризван увссар 1950 шинал Ккуллал шяраву. Буттал шяраву школа къуртал байхту, лавгун ур Совет аьралуннаву къуллугъ буллан. 1971 шинал дуклан увххун ур Выборгский Граждан авиациялул авиатортал ва техник-механиктал хIадур байсса училищалувун.
1974 шинал мугу къуртал бувну, хьуну ур техник-механик. 1984-1990-ку шиннардий заочнайну къуртал бувну бур Дагъусттаннал паччахIлугърал университетрал тарихрал ва обществоведениялул факультет. 1974-2012-ку шиннардий лехлай ивкIун ур «Авиалинии Дагестана» авиакомпаниялул самолетирттай ва вертолетирттай бортинженерну. Махъсса шиннардий зий ивкIун ур «Дагестан» авиакомпаниялий полетирттал мюхчаншиврулсса буллалисса инженерну.
Ризван цимилгу лайкь хьуну ур аэропортрал хъуниминнал чулухасса Барчаллагьрал чагъардан, ХIурматрал грамотардан.
Ризван ахиратрал шаврил кьурчIишивугу кIидачIлай, жижара буллай буру ванал душваврахь ва щалагу агьлу-авладрахь. Гьав нурданул дуцIиннав, алжаннул ххари аннав.
Ккуллал жямат,
«Дагестан» авиакомпаниялул коллектив
МахIаммадал арс Исяев Аьвдуллагь
Вай гьантрай аьпалухьхьун лавгунни бусравсса ккуркличу, ххаллилсса учитель, МахIаммадал арс Исяев Аьвдуллагь.
Увну ур Аьвдуллагь 1991 шинал Ккурккуллал шяраву. Школа къуртал бувну махъ заочнайну увххун ур Москавуллал металлопромышленностьрал институтравун. 1955-ку шиная айивхьуну, Аьвдуллагь зий ивкIун ур учительну, цал Ахъушиял райондалий, яла Лакрал райондалий. Зий уна, къуртал бувну бур Дагъусттаннал университетрал математикалул факультет. 1971-ку шиная айивхьуну Аьвдуллагь цала кулпатращал Камилатлущал зун ивкIун ур буттал шяраву Ккурклив. Ванал дишайссия физикалул, математикалул ва НВП-лул дарсру. Райондалий хьхьичIва-хьхьичI Аьвдуллагьлул бувссия НВП-лул кабинет. Дузал бувссия радиокласс. Мукунма школалул багъраву тIивтIуссия тир. Ванал хъунмасса хIарачат байва оьрчIавун цала дарсирах гъира бутан. Аьрали хIадуршиндарал бяст-ччаллаву тай шиннардий Ккурккуллал дянивмур даражалул школалул дуклаки оьрчIал мудан цалчинсса кIанттурду бугьайва. Школалий мудан итабакьайссия «Къуллугъ буллай бур жулва выпускниктал» тIисса чIирай кказит. Ва давриву бивхьусса захIматрахлу Аьвдуллагь лайкь хьуссар Обороналул министерствалул чулухасса медальданун. Мукунна ванан дуллуссар ДОСААФ-рал, ОНО-рал, ГОРОНО-рал чулухасса грамотартту. 60 шин хьуну дур Аьвдуллагьлул школалий зий. Ва ия дяъвилул ва захIматрал ветеран, Дагъусттаннал лайкь хьусса учитель. Аьвдуллагь МахIаммадовичлул хIурмат буссия учительтурал коллективраву ва дуклаки оьрчIачIа, бусравну уссия шяраваллил жяматран.
Ва аьпалул хьусса кьурчIишиву кIидачIлай, жижара буллай буру кулпатрахь, оьрчIахь, уссур-ссуннахь, махъсса гъан-маччанахь. Имандалий лавгун лякъиннав, рухI алжаннул ххари даннав.
Ккурккуллал жяматрал цIания «Ккурккуллал ккурчIа» группа
НурмахIаммадлул арс ХIасанов АьвдулвахIид
Шин хьунни НурмахIаммадлул арс ХIасанов АьвдулвахIид жущала акъану. АьвдулвахIид увссар 1941-ку шинал КIулушацIрал шяраву. Хъунмур оьрмурив ванал бувтссар Каспийскаллал шагьрулий, «Дагдизель» заводрай зий.
Цалва ххаллилсса кулпатращал архIал хъуна увссар ва чивун уккан увссар шама арс.
АьвдулвахIид гьарцаннан дакIнийссар дакI-аьмал хъинсса, цинявннащал хIал бавкьусса, чаннасса симандалущалсса инсан хIисаврай. Ва ия лайкьсса уссугу, ласгу, ппугу, ттаттагу.
Ванал бувтсса оьрму – му чIявучин эбратрансса оьрмур. Ванаясса аьпагу тачIав байкъалитIунтIиссар ва кIулну ивкIминнал дакIурдиву!
Алжаннул ххари аннав, рухI бигьаний дишиннав!
Дустал, гьалмахтал,
шяравучутал
