[dropcap]Ж[/dropcap]у, Загьранищал архIал школалий дуклай бивкIми, цукунчIав вих хьун къабюхълай ливчIун буру. АцIва гьантлул хьхьичI ванил ца акъа акъасса уссу аьпалухьхьун лавгун, ванил чIарав щябикIан, дакI кIидачIин къахъанай буну, хъинну буруккинттарай буссияв.
Амма ча пикри хьунссия жун га чIумал ца-кIива гьантлува цуппа Загьранигу гьаншиву аьзизсса уссил хъирив ва жущавагу, ганил чIарав бацIан къавхьусса къагьану, утти цуппа махъва-махъсса ххуллийн тIайла буккангу гьан къахьуншиву. КувнначIан кувннал оьвтIий, кувннал кувннахь дакIру дачIлай, гьантри лавгунни.
Загьрани азарханалийн багьайхтува, бюхъайссаксса дахIаву дуну буссияв ванищал. Цилла къашайшиву дунагу: «На оьккину бакъара, духтурталгу гьаксса ххуйну буруглай бур, гьарзат дур, хъин хьунтIиссара, чIал къавхьуну жува ккакканссару», — тIий бия.
Загьрани гьакссагу лайкьссия, халкьгу бавтIун, ххуй-ххуйсса махъругу лавхъун тIайла буккан махъва-махъсса ххуллийн. Чансса ва тагьар мадара хьувкун умуд бур, бавтIун, архIал дуклай бивкIми гьаттайн биян гьансса.
Ва хавар баяйхту цинявгу одноклассниктурал хьхьичI школалийсса чIунну дарцIунни. ДакIнин багьуна КIямашату ялавай ГьунчIукьатIув дарсирдайн архIал бачайсса куц шанмагу одноклассница: Загьрани, Кяъвахан ва Мариян. Мискин, Кяъвахан жуятува лавгун шинну хьунни, утти – Загьранигу…
[dropcap]З[/dropcap]агьрани бия мяйжаннугусса зунттал душ, ччимур ниттил ттула хьурдай чинсса. Бия хъинну дусшиву дангу кIулсса, ядангу кIулсса. Пиш тIисса симангу дия, тIивтIусса ненттабакIгу бия.
Цинма Загьранин оьрмулуву биялсса ккавккун бунува, тачIав асар хьунсса, пикри бакъа увкусса махъ жун дакIний бакъари. Ва бия мяйжаннугусса зунттал душ, ччимур ниттил ттула хьурдай чинсса. Бия хъинну дусшиву дангу кIулсса, ядангу кIулсса. Пиш тIисса симангу дия, тIивтIусса ненттабакIгу бия. ДакI-цIими бусса бия, цайминнал буруккинттарай бикIайва, циламур кьабивтун. Жун, архIал дуклай бивкIминнан, пахру бикIайва жулва одноклассница лакрал «Илчи» кказитрай зий бушиврия, архIал зузиминнал дянив бусраврай бушиврия.
Ванил чивчусса шеърирдугу буккайва чIа-чIаннин кказитрай. Бия миннувух ххаришиву хIисаврай чивчуссагу, бия щил-бунугу аьпалун чивчуссагу. Асар хьунну чичайва чичаймур.
Чичлан багьарча, Загьранияту чIявусса ххуй-ххуйсса затру ттигу чичин хьунссия. Загьранил аьпалун ва жуятува лавгсса гьантрайва бюххансса шеърирду чивчунни ГьунчIукьатIатусса Штанчаева ПатIиматлул (Бакуй яхъанахъисса) ва АхIмадова ХIуриял.
Ххирасса Загьраний! Инсантурал дакIурдиву чирахъ лахъан бан кIулсса бияв ина. Утти вилвамур оьрмулул чирахъ левщун лавгунни. Шанашу абадлий! РухI алжаннул ххари даннав!
Цинявннал оьрмурдай барачат бишиннав, ахир хайрданийн дукканнав!
Жугу Загьранищал
архIал дуклай бивкIми
