ДуркIунни Хъун дяъвилий Ххувшаву ларсун 75 шин бартлагаврил байран. Амма уттигу най бур инсантал литIлатIисса «дяъви»,
душманнан цIагу дур «коронавирус» тIисса.
Ва иширал жува жунна тархъаншиву дуллуминнал суратирттащал кIичIирттавун буккан къабивтунну. Гьай-гьай, цIуцIаву арх шайхту, гьантIиссару жува вай суратирттащал кIичIирттавух. ХIакьинурив жура ва байран, Ххувшаврил кьини хьунадакьарду жулла шарда.
ХIажимурад ХIусайнов
Нагу мукун хьунадакьав – ттулла хIаятраву. Ттула буттал, буттауссил ва щарнил буттал суратирттащал хIаятрал хъювух буккан бав ссурвал Наркизат, ПатIимат ва оьрмулул дус Аьйша. ЧIирайн лачIун дурсса ттула буттал суратрал чIарав дишинсса тIутIивнугу хьунни интнил илчиталну хъанахъисса къуппан-тIутIив.
Хъинну чIярусса аькьувартту ккурхIуну ларсъсса Ххувшавур ва.
Вихьуллал бугьарасса хъами буслан бикIайва, дяъвилул шиннардий, къатравух занай, батIлай бивкIшиву дувссилул тIясру, саргъасру ва цаймигу ичIаллил манкъулат. Миннуя, дарцIан дурну, душман ххит ансса ккуллардал гильзарду байсса бивкIун бур. Вана укун, жула саргъасру, кIичIурдугума талай бивкIссар душманнащал.
