[dropcap]И[/dropcap]нсаннан ччан дикIай гьарцагу янин чIалачIимур затраву дакIнил мутта ххари буллалисса ишара. Ккуллал райондалий яхъанахъисса инсантурал ва хъамаллурал

дакIнил мутта тирх учин буллалисса затру, тIабиаьтрал цилласса хьуннав, инсаннал цалла дурсса хьуннав, чансса дакъар.

---

Ца-кIира шинал хьхьичI, Арттабиял шяравалу диркIсса кIанайн най унува, ттун ккар­ккуна ххуллул чIарав царай караматшивуртту. Кьура метралул лахъшиврий, чIаракIуннил лагма ссуссин дурсса аьрщарал ттурцIардий, бавцIуну бия шанма мукьмурцIусса кьун-чартту. Гай, ваца девнал гьаз бувну, ги­кку бивхьуни кунма бия чIалай.
ХIакьинусса ттул ихтилат­рив, тIабиаьтрал караматшивурттая бакъарча, инсаннал цала хIасул дурсса ца ххуйшиврияр. Муна мукунсса затну хъанай бур Ваччиял шяраваллил дяних нанисса неххайх бивхьу­сса, ахьтта чу лагайсса, гьазтIи-ламу. КIа ламу цуппагу бувну бур 1960-ку шиннардий.

Ттун кIулну, кIикку хьхьичIва бикIайва чарттая бувсса ламу. Яла ца хъинну чIярусса гъараллу лачIлачIисса шинал, зун­ттава бувксса мугьалттул га чар­ттая бувмур ламу лавсун бия. Му ламу бивкIсса кIанттаяту цахъи ялавайну цIусса ламу буваннин, цукун-бунугу машинартту ратIух занан бикIайва. Ламу бивкIсса кIанайгу ахьтта чу лагайсса, муххал ганзсса маразирттай бавхIусса ламу бувуна. ЛамучIан нанисса ххуллул лултту чулий бикIайва ттучанну. (ХIакьинугу гай ттучанну бивкIсса къатри сагъ-саламатну яхьуну дур. Амма гикку цавагу ттучанмур бакъар). ХIакьину кIа ламул шия чулий хьуну бур Ваччиял шяраваллил админист­рация, культуралул къатри ва СПК-лул идара.

ЧIарав дур хъинну исвагьину, лахъну дацIан дурсса Хъун дяъвилул цIаравун лавгсса Ваччиял чиваркIуннал цIарду абад дуллалисса гьайкал. Бур шикку скамейкар­тту бивхьусса ккурчIагу. Шичча яру мюрш бивтун буруган буварча, арх дакъа чIалантIиссар хъунасса лаккучунал, Ваччиял шяравасса Гьарун Саэдовлул буттал къатригу. Цахъис гилуннайну дуссар Ккуллал райондалул администрациялул къатри. Гайннул чIарав, цIуну бувсса ламучIа, буссар Ваччиял шяраваллин 1500 шин хьушиву бусласисса ца хъунмасса чаругу.
Ваччиял гьазтIи-ламуцIун бавхIусса хаварду чIявусса бусан хьунссия. Ва хавардив бу­къавсун ацIан къахъанахъир. 1950-60-ку шиннардий шяраву яхъанахъисса инсантурачIа арцу къадикIайва.

Мунияту жу бавахъал алхIаткьини Ва­ччавсса базаллувун гьан байвав, аьнакIи бавххуну, жунна аьркинсса ручка-кьалан ласун. Муна му чIумал кIа гьазтIи-ламучIа бикIайва бавцIуну Ва­ччиял хъами-душру, жу хьунабакьлай. КIийх, Ккул-Хъусрал чулийнмай, хIакьину «Ветуправление» бусса кIанттай бикIайва базар. КIиккува баххайссия жу аьнакIив. Амма шанна къурушраяр ххишаларив щилчIав къадулайва. Гайгу гьа шайва жун аьркинлугъ ласун.

Ваччавсса ламуяр бухкъахьунсса авурсса ва лахъисса гьазтIи-ламу буссар Ккуллал шяравугу. ХIалу дагьарча, кIаниягу бусанмур буванну. Зу анжагъ ссавур дувара.