Багъишла бити жу!

«БивкIу — хъачIунттах, хиял­лу — зунттурдах» тIи­­сса учала бур оьруснал.
Жул редакциялун бишин-битан кIану бакъа ххирасса Загьрани ахиратрал хьуну, вих хьун къахъанай, маз хъамабивтун ливчIун буру.

Ду-думур ду-дуний кьариртун, аьзизсса ­уссил хъирив, байгьин къавхьуну лавгунни жул Загьрани. Ва бявкъу­сса хаварданул банд лаган бунни «Илчилул» щала коллектив. Учин, бусан къахъанай ливчIун буру.
Загьраний, ина бияв жун нинугу, ссугу. Инава жул дянив бунигу, кIулссия вин цуксса лавай­сса хIурмат-кьимат бивкIссарив вилва. Бала-апатIсса цIуцIаву сававну вийх кьини дурксса чIумал, къабювхъунни жуща вил чIарав бацIан. Муниннин уссил жижара бан оьвкусса чIумал, ина бияв агьи тIий аьтIий: «Левщунни ттул КIямашав лавхъун бивкIсса буссавагу ца чирахъ», — тIий. Утти инавагу лавгунна, абадлий цинявппа чирахъругу левщун.

Хъамакъабитулун кьариртунни жун вилла чаннасса симан, цIу бусса хъярч-махсарартту.
Загьраний! Жул «Илчилул» оьрмулухунсса корректор! Ттинин ина бакьин бувцири жул гъалатIру ккал дан хьун­сса ба­къа­хьунссар. Амма жущарив тIурча, къабювхъунни я итххяххан къабитан, я бакьин бан вил пашмансса кьадарданул пашмансса гъалатI! Ба­гъишла бити!

Вил даврил уртакьтал

ДакIнихтунусса кьурчIишиву кIидачIлай , жижара буллай буру, оьрмулул нязанний, жувагу банд лаган бувну, лавгсса

Загьрани Аьбдуллаевал
ляхъиндалухь, гъанцириннахь, «Илчилул» щалва коллективрахь. Ва бия чаннасса инсан, цилва дакIнил чанначIан циняв кIункIу буллалисса. Ва кIулцириннан чан хьуссар утти му чаннал бутIа. Жун кIулли кьувтIушиву ванил бивкIулул хавар щалва коллективрангу, лакку маз ххираминнангу. Загьрани бия куртIну лакку мазгу кIулсса, шеърирду чичаврил гьунаргу бусса, тIул-тIабиаьтралгу уздансса зунттал душ. Алжаннул ххари буваннав цув!
М. Илиясовал цIанийсса «Дараччи» фонд

Хар- хавар бакъа аьпалувух бивхьусса КIямашрал шяравату­сса Аьбдуллаева Загьранил бивкIулул къумашиву кIидачIлай буру ванил уссил щарнихь, уссур-ссуннахь, ласнахь, гъан- маччанахь, архIал дуклай бивкIциривннахь, шяраваллил жяматрахь.
Загьрани
бия тяхъасса, дакI ххуйсса, инсантуращал хIал бавкьусса хъамитайпа. Жул дакIурдиву ва сагънува личIантIиссар. Загьранил бунагьирттал аьпа баннав, рухI алжаннул ххари даннав!
ГьунчIукьатIрал школданучIасса «Дараччи» клубрал душру

Хъуннасса къумашивугу кIидачIлай, дакIнихтунусса жижара буллай буру чIун дакъасса бивкIулул жуятува батIул бувсса

Аьбдуллаева Загьранил
мачча-гъанминнахь, ласнахь, «Илчилул» щалвагу коллективрахь.
Цил бунагьирттал аьпа баннав, имандалий лавгун лякъиннав.
ГьунчIукьатIрал ккурандалул цIания ХIажибутта ХIусайнов

Жул кулпатран хъинну бювххунни Лаккуйгу чIаххувсса шяраватусса, шикку шагьрулийгу ца къатлуву яхъанай, хьунабакьлай, ххари-хъиншивурттугу архIал дачIлай, нахIу-хIалану бивкIсса

Загьранил
хар-хавар бакъасса бивкIу. Аллагьнал цил рухI хъинний дишиннав, бунагьирттал аьпа баннав.
Аьбдуллаевхъал щалагу агьулданул цIания Амин Аьбдуллаев