Дарбантлив дунни Оператив штабрал батIаву

[dropcap]М[/dropcap]айрал 19-нний Дарбантлив дурсса коронавирусращалсса талатаврин хасъсса Оператив штабрал батIаврий ххал бивгьунни анаварну дузал буван аьркинсса масъалартту. ДР-лул БакIчинал видеоконференциялул низамрай дурсса батIаврий гьуртту хьунни

ДР-лул ХIукуматрал Председатель Артем Здунов, ДР-лул БакIчинал ва ХIукуматрал Администрациялул Каялувчи Владимир Иванов, Дарбантуллал бакIчи Хизри Абакаров ва цаймигу къуллугъчитал.


БатIаврий ххалбивгьунни «Анаварсса медициналул кумаграл» даву сакин даврил, компьютердал томографрал давуртту гьарта даврил, медициналул аьркинлугъру мюнпатну ишла дуваврил, тестру даврил каширду гьарза даврил, дарурттал дузал баврил ма­съалартту.
Дагъусттаннал БакIчинал тIимунийну, Дарбантлив дуручлай бур, аьмну ларсун, ккаккан дурсса кьяйдарду, инсантурал ишла дуллай бур маскарду ва катIри. Амма шагьрулий тагьар захIматсса дур. Шагьрулул властьрал ва республикалул министерстварттал ва идарарттал дянив диялну дакъар хIала-гьурттушиву. ДР-лул БакIчинал бувсунни хIадур дуллай бушиву му масъалалуха зунсса давур­ттал план.

Региондалийсса тагьардания бувсунни ДР-лул Роспотребнадзорданул каялувчинал хъиривчу Ирина Алжанбековал. Мунил тIимунийну, ларгсса нюжмардий республикалий аьмну къашайшалт гьарза хъанахъаврил бущи ялавай багьну бур, амма 13 кIанай ми гьарза хьуну бур. Инфекция ппив шаврил хъунмур савав хъанай дур самоизоляциялул низам лиян дуллалаву. Роспотребнадзорданул каялувчинал тIимунийну, Дарбантуллал каялувчинал давуртту тIайлану дуллай ур, амма махъсса 2 нюжмардий шагьрулий къашавайсса гьарза хьуну бур, мунил зия дурну дур тагьаргу. Николай Павловлул тIимунийну, лахъи лаглай дур лабораториялул тест даврил чIун, му ласун хъанай бур так 4-5 гьантлува. ХIакьину республикалий дуван бюхълай бур 1800 хъиривлаяву, цаппара гьантравату бартдигьлан хьунтIий дур 2100-2200 хъиривлаяву.

ДР-лул цIуллушиву дуруччаврил министр Жамалуттин ХIажиибрагьимовлул бувсунни региондалийсса эпидемиялул тагьардания. Мунал тIимунийну, хIакьинусса кьини республикалий сияхIрайн лавсун ур 3553 ковидрал къашавайсса (гьантлун 93), 2003 хъин хьуну ур, азарханардай 800 инсан хъин хъанай ур, мукуна 5933 инсан ур пневмониялул къашавайсса. Республикалий ковидрал ва пневмониялул къашавайсса инсантал утту бишин буван дузал бувну бур 8828 койка. КIул бувну бур циксса аьркинну буссарив даруртту, ми ласун кумаг бантIий бур федерал центрданул.
ДР-лул ЧС-рал министр Нариман КазимахIаммадовлул бувсунни, АьФ-лул Президентнал тапшурлугърайну, Дагъусттаннайн бучIантIишиву пишакартурал группа, региондалий дезинфекциярттал давуртту бартдигьиншиврул. Республикалийн учIантIий ур циняввагу 140 инсан, аьркинсса техникалущал.
Республикалул 1-ма вице-премьер Оператив штабрал председатель Анатолий Карибовлул бувсунни медициналул зузалтран дуллуну душиву дагьайсса арцу.
Яла Дарбантуллал бакIчинал гьартану бувсунни шагьрулийсса эпидемиялул тагьардания.
БатIаврий ххал бивгьунни мукунма республикалул районнай­сса ва Азирбижаннащалсса дазуйсса иширттал масъаларттугу.
Муния махъ Владимир Васильевлул дунни цаппарасса тапшурлугъругу.