[dropcap]З[/dropcap]агьрани дунияллия лагаврил кьурчIишиву кIидачIлай, Мариян Илиясовал цIанийсса «Дараччи» фондрал хъунмур Гульшан Хасаевал увкунни «лакку мазрал хъунмур корректор лавгссар» куну.

ТIайламур бусан, Загьранин цинма къаххирая «корректор» тIисса махъ. ТтучIан гьан бувайва цилва шеърирду, социал сетирдай бихьларча, «Илчилул» корректор къабивхьуну, зузала биша учайва.

---

ПатIимат Рамазанова
Ссувай, Загьраний! Бюхъай вин му лакку махъ бакъа тIий къаххирану бивкIун бикIангу, кказит итабакьлай байбивхьуния шинмай кказитрая бакI гьаз къадур­сса ина бияв хIакьсса зузала. Амма корректор яла маз кIулмари, хъунмур корректор учавугу – вин бивщусса яла лахъмур кьиматри. Вин буниялттунгу ххуйну кIула ла­кку маз, 1991 шиная шинмай зий, цикссагу текстру канилух бувксса, жула хъунаманал, Руслан Башаевлул, увкусса куццуй, буккин, ккал дуван къахьунуксса гъалатIру бакьин бувсса вил бия махъ усттарну, багьайни багьайкун капливун бутан кIулшиврул гьунар. Вин къакьамулъя бюкъавхъуну махъ ишла буваву. «Ягъар, ПатIимат Рамазанова укун чичлан бикIайссарив, ПатIимат Рамазановал укун чичирча, цайми ци тIунссар». МукIру хьунна, кувний аьй дуллалисса тон ххуй къадизарчагума, ккаккан къабувайссия на вин, Загьраний. Ина тIимуницIун нава бакьлай бакъахьурчагума, бяст къабувайссия. Ттунманияр вин маз ххуйну кIулшиврий дакI дарцIуну буну тIий. Щукру, вил дакIнийн щун къабувсса, бур-бакъарду вищал къабувсса.
Вил дакIниву, буниялагу, цIакь хьуну дия лакку махъ тIайлану чичаврил ва ишла баврил ялувсса кьянкьасса бацIаву. Цуксса тIайлабацIу хьухьунссар жун, «Илчилул» коллективран, лакку маз марцIну ябаврил къаралданий мукун цIакьсса къаралчи бивкIшиву! Махъзуманив, нава шаппа зун багьлагьисса чIун дуну, даву ялун дагьсса Къардашов азурда къаулланача куну, цIуххаймур вихь-я цIуххайсса, кказитрал полосарду вотсапрай иная ттучIан гьан бувайсса.

Вил аьпалун къалиххан буванна ми полосардугу, жулва махъва-махъсса хавардугу. Хаснува: «Вирусри тIий, мусиватсса ца букъавчIай бала бур, бурувччуну бикIияра инавагу, оьрчIгу» тIисса, аманатну хьусса махъра-махъмур смс-кагу. Ядуванна, жува «Инт» кафелуву ЦIушинал байран дуллалийни, ца ххуйну даркьусса чалагъайгу руртун, ина Руслан Къардашовлущал къавтIутIисса видеогу. Ина та кьини яла ххуймур къавтIала хIисаврай бахшишрангума лайкь хьуссияв. Ххишала жущал къавтIун бизан къахьун­сса кIулну къавтIутIи бувну бухьунссияв.
Ссувай, Загьраний! Ина, даврил уртакь бакъасса­гу, шагьрулийсса ттул чIаххудушгу бияв. Утти на даврийгу луглантIиссара вих, чIаххуврайсса хIаят­раву­гу…