Абакаров ХIасан-Бутта Абакардул арс увссар 1916-кусса шинал Къяннал шяраву. Ппугу ва чIивину уна ивкIуну, ливчIссар ниттищал ва цаярва кIира шинал хъунасса уссищал, кIира шинал чIивисса ссищал. Ва диркIссар революциялул чIун, хъинну захIматсса,

букансса ччатIух аваданминнаха зун багьлагьисса. Хъунама уссу Аьбдуразакь чагуртну лавгун ца-кIира шинава ХIасан-Буттагу цачIана Киеврайн увцуну ур оьрус маз ла­хьхьин, школалийн занан.

---

1934-кусса шинал ва увххун ур Дагъусттаннал педагогикалул институтравун рабфакрайн, 1937-кусса шинал вагу къуртал бувну, увххун ур Дагъпединститутрал тарихрал факультетрайн.
1941-кусса шинал, июльданий, дахьа диплом лавсъсса жагьилнайн бувкIун бур дяъвилийн ачинсса чагъар. Москавливсса В.И. Лениннул цIанийсса элмурдал академиялучIасса политруктал шайсса курсругу къуртал бувну, сентябрь зуруй тIайла увккун ур кьиблалул фронтрайн.

1941-1942 шиннардий буручлай ивкIун ур Таганрог, Новороссийск, миномётрал батальондалул комиссарну. Гьуртту хьуну ур Ростов, Кубан мурахас буллалисса талатавурттаву. Талай ивкIун ур Орловско-Курская Дугалий, Украиннай, Полшанаву. Одер нех лахъайнигу гьур­тту хьуну ур.
Ххувшаврил кьини хьунадаркьуну дур Германнал Рос­ток тIисса шагьрулий. Дяъвилий дурсса къучагъшивурттахлу дуллуну дур ЯтIул ЦIукул орден, Буттал кIанттул цIанийсса дяъвилул орден ва 13 медаль.

Дяъви къуртал хьуну махъгу, 1956 шинайн ияннин къуллугъ буллай ивкIун ур Совет аьралуннаву политчастьрал командирнал хъиривманугу, полкрал политотделданул партиялул комиссиялул секретарьнугу. 1956 шинал подполковникнал чиндалуву увккун ур чулданийн.
Муния махъ, пенсиялийн уккан­нин, зий ивкIссар Да­гъусттан Республикалул Госбанкрал кад­рардал начальникну, чIярусса шиннардий гиккува партиялул организациялул секретарнугу.
ХIасан-Бутта ия ххишала акъа хъинсса, хIал бавкьу­сса, тIайлашиву ччисса, цала миллатгу, буттал кIанугу ххирасса инсан. Цал бунагьир­ттал аьпа баннав. Вагу гьурттуну жула буттахъал жунна кьариртсса Ххувшаврил кьадру тачIаввагу чан къахьуннав хъиривсса никирттачIа.