Жулла ссавурди вирусрансса дарман

Республикалий, гьантлия гьантлийн тIиссакссагу, захIмат хъанай дур коронавирусрал эпидемиялул тагьар.

Ва ишгу хIисавравун лавсун, Да­гъусттаннал Роспотребнадзорданул управлениялул хъунама Николай Поповлул хIукму бунни апрельданул 30-ннин цинярдагу диннал идарарттал аьдатру дуван онлайн-трансляциярдал кумаграцIух. Къадагъа душиву агьалинан баян бунни диндалул иширттацIун бавхIусса кIанттурдайн батIлан. Мяйжанссар, бувчIин бунни инсан уччин хIатталлив бучIаврин къадагъа дакъашиву.


ПатIимат Рамазанова
[dropcap]Б[/dropcap]увчIлай бур жунмагу, республикалул хъунама санитар хIакиннал укунсса тIалавшинна дуваврил савав. Ларгсса бигьалагай кьини ххачпараснал Пасхалул байран дия. Тарихраву уттинин къавхьусса иш бия: Байтул Мукьаддасрай Заннал храмраву Мубараксса цIу ласаврил аьдат дуллалинийгума инсантал бакъая. БухкIуллух бур зумаритавал барз. КIихIуллану ливчIун бур инсантал: ца чулуха, цукунни жижаралийн къагьантIисса, цукунни бивкIулул аьдатрал хIурмат къабувантIисса, гамур чулухагурив, нигьгу дур агьалинал дакIурдиву.

Ттун ва ишираву ххуй бивзунни, агьалинайн оьвтIий, лажиннича, хъинну гъанми бакъа, мабучIару жижара буван, телефондалувух бувсса жижарагу кьамулссар тIисса ца хъамитайпа. Щил ци учирчагу, вари тIайламур ва инсантурай аьтIутIимур тIий бура. Инсантурай мяйжаннугу дакIцIуцIаву ду­сса агьлу, инсантал шаппай бучIан буллай, мавлудру дуллай къабикIанссар. Бур укун­ссагу. СсукIурайн батIаврил хIакъиравурив, ттун ххуй дирзунни нугъайнал кказитрал редактор Эльмира Кожаевал Фейсбукрайсса оьвчаву: «Агар жижаралийн лакъавгун чара бакъахьурча, хьулухва бавцIуну, алхIам бу­ккияра, яла, кутIасса хIаллай бавцIунугу бивкIун, насияра гиччава», — тIисса. Буниял­ттунгу, бивкIулий лахъи лаг­лан аьркиншинна дакъар.

Ссавурданий бацIан аьркинсса чIун дуркIун дур, жуйва дакIцIуцIиминнал тIимургу бувну. Москавуллал мэр Сергей Собяниннул, Пасха барча дуллай, «коронавирусрал пандемия – инсаншиву ххал дуллалисса тестри» увкунни. Ванал увкумуницIун къабакьин къахьунссар. Жулва лагма-ялттуминнан ка-кумаггу бувну, дуван багьайнай аякьагу дурну, зана-кьулу хъанахъавур цIанакулсса кумаг ва кабакьаву. Гьаннайсса, яла-яла, жулла ссавурди вирусрансса дарман.