Сиражуттиннул арс Кьурбанов Низами

Март зурул 8-нний хар-хавар бакъасса бивкIулул жуятува личIи унни ххаллилсса зунттал чув, Ккуллал шяравасса Сиражуттиннул арс Кьурбанов Низами.

Низами увну ур 1979 шинал Ккуллал шяраву Сиражу­ттиннул ва Зубайдатлул кулпатраву. Буттал шяраву школагу къуртал бувну, дуклан увххун ур МахIачкъалаллал автоххуллурдал колледжравун. Муния махъ къуллугъ буллай ивкIун ур хьхьирил флотрай Владивостокрай. Зана хьуну мукьах зий уссия личIи-личIисса давурттай Москавлив.

Низами инсантуравугу, давривугу хIурмат ххисса, хьхьичIунсса инсан уссия. Цибанссар, азарданул ххассал хьун къаивтунни. Вакссава бухьун­ссия Аллагьнал ванан буллусса оьрму.
Низами ахиратрал шаврил хъуннасса кьурчIишивугу кIидачIлай, жижара буллай буру ванал агьлу-авладрахь, буттахь Сиражуттиннухь, ниттихь Зубайдатлухь, уссихь, ссурваврахь, буттауссурваврахь.
Низамил рухI хъинний дишиннав, алжаннул ххари аннав, махъминнал оьрмурдай барачат бишиннав!

Ккуллал жямат,
дустал, гьалмахтал

Ибрагьимлул арс Чалабов Иосиф

Хар-хавар бакъасса бивкIу­лул жуятува личIи унни ххаллилсса лаккучу, щала миллатгу, Лакку кIанугу ххирасса муаьллим, Ибрагьимлул арс Чалабов Иосиф.

ДГТУ къуртал бувну махъ 34 шинай ва зий уссия МахIач­къалаллал 15-мур школалий, цала махъра-махъсса кьинилийн ияннин. Иосиф ия дакI аьчух­сса, инсантуращал хIал бавкьу­сса инсан, дуклаки оьрчIан ххирасса муаьллим-тарбиячи. Мусил кару дия цаллагу, цимурца дан кIула.
ХIайп, къаивтунни цала чIивима арснал хъатIий къавтIун изан, гъирарай унува! МахIрумну ливчIунни дусталгу.
Хъуннасса кьурчIишивугу кIидачIлай, жижара буллай буру кулпатрахь, арсваврахь, ва махъсса цинявппагу гъан-маччанахь. Алжаннул ххари аннав. Гьав нурданул дуцIиннав, махънал оьрмурдай барачат бишиннав!

Читтурдал жямат

АьвдуллатIиплул арс
Сулайманов Зиябуттин

Мартрал 24-нний, цала ахъу­ву кушу тIий унува, дунияллияту лавгунни ххаллилсса чув-адамина, гьарцаннал чIарав ацIан хIадурсса, шяравуминнангу, гъан-маччанангу ххирасса, Хьурттал шяраватусса Сулайманов Зиябуттин АьвдуллатIиплул арс.

Зиябуттин увну ур 1936-ку шинал Хьурттал шяраву. ЧIавания шинай ва захIмат буллай ивкIссар колхозрал давурттай, зий уссия колхозрал къурнил бригадирну, яла – личIи-личIисса, жаваб дулайсса давурттайгу.

Хьурив багъру буллай байбивхьусса шиннардий зий ­уссия багъирдал бригадирну. Муния махъ, цаппара колхозру цачIун дурну, «Хьуринский» сакин дурсса чIумал Зиябуттин зий ивкIссар Хьуртталмур бутIул каялувчину. ХIасил, шяраваллил давурттай хъинну хъунмасса хIаллай захIмат буллай ивкIсса инсанни Зиябуттин.
Колхоз-совхозру лирукун, цалла аьрщарай цанма багъ буллай уссия. Ванал бувсса багъ ца яла ххуймур багъри цуппагу Хьурттал шяраву.
Ххувшаврил 75 шинан хасну Гъумук хьунтIисса шадлугърай Хьурттал шяраватусса дяъвилул гьурттучитураясса махъ лахъан хIадур хъанай уссия.

Зиябуттин дунияллияту лагаврил кьурчIишивугу кIи­дачIлай, жижара буллай буру кулпатрахь, арснахь, душваврахь ва махъсса цинявппагу гъан-маччаминнахь. Цал гьав нурданул дуцIиннав, алжаннул ххари аннав, махъ ливчIнал оьрмурдай барачат бишиннав. Амин.

Хьурттал ва ХьурукIуллал жяматрал цIания АьвдуллатIипов АьвдуллатIип

Кьурбаннул арс МахIаммадов МахIаммад-Шарип

Вай гьантрай дунияллия лавгунни Бархъаллал шяраватусса захIматрал ветеран, медициналул элмурдал кандидат, ххалли­лсса хIакин ва чичу, Кьурбаннул арс МахIаммадов МахIаммад-Шарип.

Увну ур ва Бархъалав 1942 шинал. МарцIну ххювардай школагу къуртал бувну, Дагъусттаннал медициналул училищалувун дуклан увххун ур. Му къуртал бувайхту, зий ивкIун ур Ахъушиял райондалийсса Уссищиял шяраву ФАП-рал хъунаману. Муния махъ, аьрали буржгу биттур бувну, дуклан увххун ур Пироговлул цIанийсса Москавуллал кIилчинмур мединститут­равун, мичча яла перевод ларсун дур Патрис Лумумбал цIанийсса Халкьуннал дусшиврул университетрал медициналул факультет­райн. Дуклайгу унува, зий ивкIун ур анаварсса кумаграл азарханалий. ЯтIул дипломращал университетгу къуртал бувну, зий ивкIун ур Склифосовскийл цIанийсса институт-азарханалий 23 шинай, яла – элмийсса зузалану, хIакин – патологоанатомну. Зий уссия Склифосовскийл институтрал биялдарайсса колледжраву дарсру дихьлайгу, патолоанатомиялул касмукартал хIадур буллай интернатуралуву ва ординатуралувугу.

ХIакин хIисаврайгу, аьлимчу хIисаврайгу МахIаммад-Шариплул дурсса давурттан хIукуматралгу ххуйсса кьимат бивщуну бур. Мануал медицина хьхьичIуннай дуваврихлу ванан «Арцул диплом» буллуну бур 2004 шинал, 2011 шинал тIурча, хIалал бувну бур «Арцул Ису» тIисса диплом, дуллуну дур Мануалогиялул институтрал «Магистр» тIисса цIа. Ванал бия чичрулул гьунаргу. «Медициналул кказитрай» дуркссар ванал чIярусса макьалартту, итабавкьуссар «Медициналул афоризмарду» тIисса лугу, бувкссар «Зунттавату увкIма» ва цаймигу прозалул луттирду.

2005 шиная шинай ва уссия М. Буяновлул цIанийсса Аьрасатнал хIакинтурал-литератортурал ккурандалул членну. МахIаммад-Шарип Москавлив хъин хьун бучIайсса цинявппа бархъаллангу, дагъусттаннал агьалинангу цащава шаймур бувайсса, дакI-аьмал ххуйсса, хIакьсса хIакин ва ххаллилсса инсан уссия. Мудангу чялишну хIала уххайссия Москавливсса Дагъусттаннал диаспоралул давурттавухгу.
ДакIнихтунусса кьурчIишиву кIидачIлай, жижара буллай буру ванал кулпат Марижатлухь, арсру МахIаммадлухь ва Оьмардухь, вайннал наслулухь. Алжаннул ххари аннав, гьаттай нур дизаннав, махънахьхьун цIуллушиву дулуннав!

Бархъаллал жямат,
Москавливсса Дагъусттаннал Культуралул центр

РАМАЗАННУЛ АРС АКАРАЗУЕВ ХIАСАНБАГ

[dropcap]О[/dropcap]ьрмулул 88 шинаву, захIматсса цIуцIаврища хха­ссал къавхьуну, аьпалухьхьун лавгунни Хъусращатусса Хъату Ра­зухъал тухумраясса ххаллил­сса адамина, хъуначу, захIматрал ветеран, Рамазаннул арс Акаразуев ХIасанбаг.

---

Увну ур ХIасанбаг Хъусрахь 1932 шинал. Ванал оьрчIшивугу, дяъвилул шиннардил цайми оьрчIал кунна, захIматсса хьуну дур.

Дяъвилия махъ щала оьрму ХIасанбаглул Хъусращиял колхозраву личIи-личIисса давур­ттай зий лавгунни. ЧIярусса шиннардий Ккурунналивусса гъаттарал фермалул хъунаману зий уссия. Ванал каялувшиврий ферма хьхьичIунсса ккаккияр­ттащал зий диркIссар, мудангу райондалул ХIурматрал улттуй дикIайссия. Пенсиялийн увккун махъгу, цува мушакъат хьуннин, зий уссия колхозрал председательнал кумагчину, правлениелул членну. Лажин кIялану був­сса захIматрахлу ва лайкь хьуну ур 5 медалданун ва чIярусса хIурматрал грамотарттан, бахшиширттан.
Ци даврий ухьурчагу, ХIасанбаглул ккаккан був­ссар цува хъинну дакI аьчух­сса, тIайламур ччисса, цаманал чIарах ацIан чялишсса, гьарнащалагу авкьусса чув ушиву.

Цала кулпат Качардущал (аьпабиву), цачIу хъунигу бувну, дуккингу бувну, цала-цала ххуллийн бивчуссар 2 арс ва 4 душ. Пенсиялийн увккун махъгу, оьрчIал оьрчIах уруглай, минналсса буллайна икIайссия.

ХIасанбаг дунияллия лагаврил кьурчIишиву кIидачIлай, жижара буллай буру оьрчIахь, душваврахь ва махъсса циняв­ппагу гъан-маччанахь. Цал гьав нурданул дуцIиннав, алжаннул ххари аннав, махънал оьрмурдай барачат бишиннав.

Хъусращиял жяматрал
чулуха Гаргацов Азрим