Ххишала хьунни ттигу ца ххуйшиву ЦIуминалий

[dropcap]Ф[/dropcap]евраль зурул 23-нний ЦIуссалакрал цIуминалий дия хъуннасса байран. Аьхъардал ва Шушиннал шяраваллал дянивсса майданнив кIюрххилва бавтIун бия махлукьат.

Баллай бия зюннав-дачIулул чIурду. Ва кьини шикку шадлугърал даражалий тIитIлай бия 2500 гектарданул манзилданийхсса «Дусшиву» тIисса парк.


Шикку гьуртту хьун бувкIун бия Дагъусттан Республикалул ХIукуматрал Председатель Артем Здунов, ДР-лул БакIчинал ва ХIукуматрал администрациялул каялувчи Владимир Иванов, ДР-лул БакIчинал ва ХIукуматрал администрациялул госслужбалул масъаларттаха зузисса управлениялул хъунама Артур Исрапилов, ДР-лул Халкьуннал Мажлисрал председательнал хъиривчу Камил Давдиев, экономикалул министр ХIажи Султанов ва цаймигу бусрав­сса хъамал.
Ва парк буллай байбивхьу­ссар 2019-ку шинал «КIанттул сиптарду» тIисса региондалул проектрал лагрулий. Хъунмасса Буттал кIанттул цIанийсса дяъвилий Ххувшаву ларсун 75 шин шаврин хасну вара кьини паркраву тIиртIунни Аьхъардал ва Шушиннал шяраваллава дяъвилийн лавгминнал цIарду абад дуллалисса бюхтулсса мармарчарил гьайкал. Мукунма шикку тIивтIунни оьрчIру бялахълансса майдан, этно-майдан, фонтан. Бувну бия инсантал занансса ххуллурду, бивхьуну бия скамейкартту, бувгьуну бия 500-нния ливчусса личIи-личIисса журалул мурхьру, хъункIултIутIал къатIри.

Шадлугърал мажлис тIив­тIуна ЦIуссалакрал адми­­нист­рациялул бакIчи МахIаммад­хIажи Айдиевлул. Хъирив ихтилат бувна Артем Здуновлул.
— Укунсса ххаллилсса давурттив дуллай, паркру, спорт-майданну, школартту ва цаймигу объектру тIитIлайри жущава Дагъусттан цIу буккан бан, Да­гъусттаннал аргъ дизан дан, шиккун туристътал кIункIу буллан бюхъантIисса, — увкунни ванал ва барчаллагь увкунни ва давриву кабакьу бувсса кIирагу шяраваллил жяматрахь.

Парк тIитIаву барча дуллай­сса ихтилатру бунни Владимир Ивановлул, Камил Давдиевлул ва м. ц.
Ихтилатру къуртал хьуну махъ паркрал давурттавух чялишну гьуртту хьуминнан ва 1999 шиналсса ополчентуран дуллунни ХIукуматрал наградартту.
Хъирив, гьайкалдануцI тIу­тIивгу дирхьуну, ливтIуминнал аьпалун минутIрайсса пахъ багьаву дурунни.

Му лахIзалий хъунасса къуллугъчинал дурсса ца тIулгу асар хьунни: гьайкалданучIа пострай бавцIусса дуклаки оьрчIру бяхълай бушиву хIисав хьуну, Владимир Ивановлул, лирккун цаятура ккуртту, кIюлану ларх­сса оьрчIал хъачIунттайн дуртунни.

Байран ххаллилну чIюлу дурунни Дагъусттаннал эстрадалул артистътурал ва ЦIуссалакрал райондалул управлениялул культуралул къатлул зузалтрал хIадур дурсса концертрал.

Андриана Аьбдуллаева,
Имара Саидова