Бархъаллал дянивсса шахматирттал турнир

Кьурбан МахIаммадов

[dropcap]Ф[/dropcap]евраль зурул 23-нний, Ватан дуруччултрал кьинилун хасну, Лениннул цIанийсса паркраву, хьунни Бархъаллал шяравасса жагьилми ва оьрмулул хъуними гьуртту хьусса шахматрай буккаврил турнир.

Андриана Аьбдуллаева
Гьашину кIилчинсса шин дур ва турнир дуллай. Ванил сиптачиталну ва сакиншинначиталну бур Аьлил ХIасанов ва Оьмар Аьлиев. Ва турнир аьдатравун дутансса пикри бур сакиншинначитуран.

Гьашинусса турнирданий гьуртту хьунни 18-20 инсан. Яла чIивима шахматист ия 6 шинаву­сса — МахIаммад-Расул Асанаев, яла хъунама ия 82 шин хьусса — Къиш­ттили МаматIиев.
Цалчинсса кIану бувгьунни 8-мур классраву дуклаки­сса МахIаммадов Кьурбаннул, кIилчинмур – МаматIиев Къишттилил, шамилчинмур – МахIаммадов Асадуллагьлул. Турнирданул хъунама судияшиву дуллай ия Оьмар Аьлиев. Ххув хьуминнан дуллунни медаллу ва кубокру. Турнир къуртал хьуну махъ щябикIаву хьунни «Балхар» кафелуву.

Турнир дуллалиминнал умуд бур шиная шинайн ванил сий гьаз хъананссар ва гьуртту хьун ччими гьарза хъананссар тIисса.
Шиккува букъавсун къабучIир Лениннул комсомолданул цIа­нийсса паркраву шахматир­ттай буклансса павильонгу Аьлил ХIасановлул ва Щаратусса Зайнул­аьбид ЛатIиповлул хIарачатрайну щаллу хьушиву.

— Совет заманнай паркраву бикIайссия гъинттулсса кинотеатр, библиотека, аттракционну. Амма 90-ку шиннардий ми гьарзат пасса-пархха хьуна. Шахматирттай буккан ччимигу дякъийгу, кIиришиврийгу кьатIув, скамейкардай щябивкIун буклай бикIайва. Жу шагьрулул хъуниминнацIух занай, ссайнчIав буклай бакъаяв. ТалихI хьуна ца ппурттуву парк­равух нанисса Хизри Шихсаэдовлуйн тIайла бацIаву.

Гъан хьуну цинявппагу шахматистурал цIания тавакъю бувссия, шахматирттай буккайсса павильон бан кабакьу бува куну. Цала махъ бацIан бувна Шихсаэдовлул. 2016-ку шинал кIира-шанна нюжмардул дянив бувссар ва цIана жу турнир дурсса павильон. Шадлугърал даражалий­сса тIитIавугу хьуссар. Му чIумал, ина жаваблувману икIантIиссара куну, кIуллигу ттухьхьун дуллуна, — тIий, буслай ур Аьлил. Гьашину мукьра шин хъанай дур павильон тIивтIуну. Ва мяйжаннугу хъунна­сса ххаришивуну хьунни паркравун шахматрай буккан батIайминнан.