«Дагестан» РИА-лул залдануву хьунни «Ххувшаврил варистал» тIисса цIанилусса дунияллул халкьуннал дянивсса проект зузи даврил хIакъиравусса пресс-конференция.
Андриана Аьбдуллаева
[dropcap]П[/dropcap]роектрая бувсунни «Аьрасатнал бивкIу бакъасса полкрал» исполкомрал хъунаманал хъиривчу Наталья Щадринал ва проектрал координатор Людмила Саидовал. КIицI ларгсса проектрал мурад бур жула оьрчIан, ялун нанисса никиран Аьрасатнал цIанихсса тарих, хаснува Хъунмасса Буттал кIанттул цIанийсса дяъвилуцIун дархIусса лажинтру кIулну дикIаву, дяъвилий къучагъну талай бивкIсса жула буттахъал аьпа абад баву.
[dropcap]Ч[/dropcap]IалачIисса куццуй, хIакьину чил билаятирттал хIарачат бур, Хъунмасса Буттал кIанттул цIанийсса дяъвилул тарих баххана буллай, совет халкьуннал дурсса лайкьшивуртту чIири-чан дуллай. Мунияту жагьилминнан кIулну бикIан аьркинссар жула тарих.
— БивкIу бакъасса полкраву жула оьрчIру цивппа рязину, гъирарай бачин аьркинссар, — увкунни ванил.
Наталья Щадринал бувсунни проектрал лагрулий нанисса конкурсраятугу. Ларгсса шинах бурувгун конкурсрал тIалавшиннарду ххишала хьунни. Утти дяъвилул участникнал бивтсса ххуллу ахттар баврицIун, оьрчIал гьарта-гьарзану бусан аьркинну бур дяъвилий талай ивкIсса гъанчунал оьрмулия, та гьуртту хьусса дяъвилул иширттая, аьрали наградарттая, мукунна ишла дан аьркинссар кулпатрал архив.
— Уттинин конкурсрай гьуртту хьун Дагъусттанная аьрза буллунни 116 инсаннал. Щалагу Ухссавнил Ккавкказуллал федерал округрая тIурча – 500 инсаннал. Аьрзри кьамул буллалиссар март зурул 31-ннийн бияннин. Конкурсраву гьуртту хьун бюхъайссар 11 шинава байбивхьуну 18 шинавун бияннинсса оьрчIаща. Гьарица региондалул дикIантIиссар цалла хIадур дурсса бахшишру, сувенирду, дипломру.
Конкурсрал комиссиялуву бикIантIиссар цIанихсса аьлимтал – тарихчитал, музейрал ва библиотекарттал зузалт, жяматийсса ишккаккулт, — бувсунни ванил. Хъирив Наталья Щадринал ва Людмила Саидовал журналистурал суаллахьхьун жавабру дуллунни.
