Ппиринж бугьан жунма кумаг буванну кунни

Мартрал 3-нний ДР-лул БакIчи Владимир Васильев гьуртту хьунни АьФ-лул шяраваллил хозяйствалул министр Дмитрий Патрушевлул каялувшиврий видеоконференциялул низамрай хьу­сса батIаврий.

Мунил лагрулий дунни 2019 шинал «АПК-лул сурсатирттал экспорт» тIисса федерал проект бартдигьаврил хIасиллу, ва мукунна ххал диргьунни гьашину миннул мурадлувсса ккаккияртту хьун даврил хасъсса давурттал план.


Владимир Васильевлул ихтилат бунни Дагъусттаннай мелиорациялун хасну дуллали­сса давурттал хIакъираву, хаснува ппиринж бугьаврил хъуру гьарта-гьарза даврия. Мунал бувсунни мелиорациялул давурттан федерал бюджетрава арцуйнусса кумаг аьркинну бушиву.
Дмитрий Патрушевлул бакI­райн лавсунни му масъала дузал бувансса чаран лякъин.
Муния махъ республикалул каялувчинал дунни республикалул даражалийсса батIавугу. Муний гьуртту хьунни ДР-лул 1-ма вице-премьер ХIажимахIаммад ХIусайнов, вице-премьер Аьбдулмуслим Аьбдулмуслимов, ДР-лул шяраваллил хозяйствалул министр Абзагьир ХIусайнов ва ДР-лул экономикалул ва территориярттал лябуккулул министр ХIажи Султанов.
Ххал дигьлагьисса проект Дагъусттаннай дузрайн дуккан даврил хIакъираву Владимир Васильевлул увкунни:

-Аьрасатнал дазул кьатIув жура дарххуну дур 1,5 млрд. къурушрансса сурсатру. Му хъин чулийсса ишри – 14 процентрал лябукку. Жула экспортертал хъанай бур Азирбижан, Иран, ЦачIундур Аьрабусттаннал Эмиратру, Къазахъисттан, Турция. 2020 шинал жура даххан най буру 1,6 млрд. къурушрансса сурсатру. ДакI дарцIуну буру му план биттур даншиврий.

Республикалул каялувчинал, аьщу-ххуттай авцIуну, бувсунни цукунсса сурсатру ва чун даххантIий буссарив. МуницIунма дакIнийн бувтунни республикалий хьхьичIххуттай бушиву мелиорациялул масъалартту. Ми давурттан дукIу итабавкьуну бивкIшиву 500 млн. республикалул бюджетравату.

Региондалул каялувчинал гьаз бунни мукунма паччахIлугърал шяраваллил хозяйствалул зузи идарарттал мюнпатшиву лахъ даврил масъалагу.

ХIадур бувссар
ХI. Аьдиловлул