«Ци тIилисин буссарив лак­рал аьрщарай къакIулли, цалчинсса летчица-парашютистка Бавер ЖахIпарова лакку душ бур, мукьийла дунияллул чемпион хьусса Наби Аминтаев ла­ккучу ур,

Совет Союзрал Виричу летчик-космонавт Муса Маннаров лаккучу ур», — увкуна 2017 шинал ЦIуссачIурттащиял школалий (Новострой) Бавер ЖахIпарован гьайкал тIитIлатIисса мажлисрай Дагъусттаннал Ветерантурал председатель МахIарам Аьлиджановлул.

---

Андриана Аьбдуллаева
[dropcap]Ч[/dropcap]Iурттащиял шяравасса Патааьлил душ Бавер ЖахIпарова бувну бур 1920 шинал Щурагь. Ванил оьрмулул 10 шин хьусса чIумал вайннал кулпат бивзун бур ЧIурттахьхьун. Бавердул ппу магьирсса заргал ивкIун ур, Парижлив, Лондоннай, Берлиннай ва цаймигу билаятирттал шагьрурдайсса выставкарттай гьуртту хьуну, бахшиширттащал учIайсса ивкIун ур. Патааьлихъал кулпатраву 10 оьрчI бивкIун бур. Цинявппагу гьунар бусса, давриву-дуккавриву итххявх­сса бивкIун бур.

Ца ппурттуву, 10 шинавусса Бавер школалийн нанисса чIумал, ванин ххал хьуну дур бюхттулну гьава буллалисса аэроплан.
«Инсантал, лелуххант кунма, лехлай бур», — тIий, махIаттал хьуну бивкIун бур Бавер, ва шавкь дагьну дур бюхттулну гьава бан­сса. Муния махъ ванил пикрирдаву ва хияллаву кIа аэроплан диркIун дур. ХьхьичI дацIлан диркIун дур чаннаннил лелуххул штурвалданух цуппа щябивкIсса сурат.
Школагу къуртал бувну, Бавер бувххун бур Щурагьсса Дагъус­ттаннал педагогикалул техникумравун. Амма буттал жагьилсса душ цуппалу шагьрулий къабитан, техникум къуртал баннин къабивтун, махъунмай шяравун бувцуну бур. Шяравун зана бикIайхту, Бавердул гава Щурагьиял педтехникум къуртал бувсса цила хъунмур ссищал, ПатIиматлущал, тIивтIуну бур шяраваллил халкьуннан буккин-чичин лахьхьин буллалисса ликпункт. Амма летчица хьунсса хиял ца лахIзалийвагу ванил бакIрава буклай къабивкIун бур.

Ца-кIира шинава махъунмай шагьрулийн бувкIун, цила дуккавугу къуртал дурну, Бавер бувххун бур МахIачкъалаливсса леххултрал школалийн. Цихьва душнил ва хавар бувсъсса чIумал, нину цал ци тIунссарив къакIулну диркIун дур. Гьай-гьай, зунттал душваран къалайкьсса пишану чIалай бивкIун бур, амма ссавурданий кьамул бувну бур. Ча дакIнийн багьанссия та чIумал ХIуруннун цила душния Дагъусттаннай цалчинсса летчица ва парашютистка хьунссар тIисса пикри.

У-2 самолетрай мукьцIалийла левххун бур Бавер. Ванил хиял бивкIун бур буттал шяравун ЧIурттахьхьун самолетрай бучIансса. Сивсусса Бавердул му хиялгу дузрайн буккан бувну бур. Шяравунсса 183 километрагу кIира ссятрал дянив риртун, щядиртун дур самолет шяраваллил хьхьичIсса арив. Жяматрал ва лахъа-хъунну, виричу кунма хьунабавкьуну бур. Леххултрал училище къуртал бувну махъ Бавер гиккува зий бивкIун бур.

Мунияр махъ зий бивкIун бур Дагъусттаннал ЦИК-рал инструкторну, республикалул прокурорнал хъиривмурну, комсомолданул обкомрал Цалчинмур секретарьну.
Республикалул прокуратуралий зузисса чIумал кIул хьуну бур ва КГБ-лул зузала, ЧIаратусса Саэд Баратовлущал. ЧIал къавхьуну вай ташулулгу хьуну бур. Амма, дяъви байбивхьуну, вайннахьхьун цала талихIрая неъмат ласунсса му­тта къабуллуну бур. Саэд ряхва зуруй­сса бахьттагьалтрал командиртал хIадур байсса училищалуву дуклан Щурагьун гьан увну ур.

[dropcap]Ч[/dropcap]Iявусса прокуратуралул зузалтгу дяъвилийн тIайла буклай бивкIун бур, Бавердулгу кьаст лархIуну дур дяъвилийн гьан. Амма ва, оьрчIах хьуну бушиву кIул хьуну, зана бивтун бур. Гъан-маччанал бусласимунийн бувну, Бавердул арс хъуна хьуну махъгу бювкьу байсса бивкIун бур, ина сававну на дяъвилийн къалавгссара тIий.

Дяъвилийн къагьарчагу, тай шиннардий ванил багьа бищун къашайсса даву дурну дур, гьавалул ва десантрал аьралуннаву къуллугъ буллансса летчиктал хIадур буллай. МахIачкъалаллал авиациялул клубрал ххюя выпускник Совет Союзрал Виричу тIисса цIанин лайкь хьуссар. Тай дяъвилул шинну, гьарнан кунна, Бавердунгу хъинну захIматсса хьуссар. Дунияллия лавгссар ванил ппу. Лейтенантнал чингу ларсун, лас Ленинаканнайн саллатI дяъвилийн хIадур буллан гьан увссар. Яхьуну бур ванал дяъвилия БавердучIан бувкIсса чагъардгу.

«ЯхI бува, жула оьрму щала хьхьичIри бусса. Душмангу ххит увну, ххувшавугу ларсун, зана хьунна», — тIий чичлай ур Саэд. Амма къанясив хьуну бур вайннан дяъви къуртал хьуну махъ хьунабакьин.

БувкIун бур БавердучIан: «Вил ласнал, Баратов Саэдлул, Хъунма­сса Буттал кIанттул цIанийсса дяъвилий къучагънал кунна жан дуллунни», — тIий, бусласисса шанмурцIу чагъар. Саэдлул жан дуллуну дур Ккавкказ буручлачи­сса талатавурттаву. Бавердунгу багьну бур буттал лажин къаккарксса арс циналу хъуна уллан.
Бавердул цIа машгьур хьуну диркIссар щала Дагъусттаннайх. Ва Дагъусттаннай бакъассагу, щалагу Ухссавнил Ккавкказнаву цалчинсса летчица-парашютистка бивкIссар.

Цалчинсса Дагъус­ттаннал хъаннил съездрай Бавер президиумрал председательну бувчIуссар. Та съездгу Дагъусттаннал тарихравун багьсса иш хьу­ссар. Съездрай Бавердул цинявннан асар хьунсса ихтилат бувну бур. Съезд къуртал шайхту, баян бувну бур Бавер ЖахIпаровал цила гьунар ккаккан бантIиссар аэродромрай куну. Зунттал душ-лачин гьаваллавун гьаз хьуну, нигьачIисса увинтру дуллан бивкIукун, тамаша буллалими нигьал лажинтру кIучI дуллай бивкIун бур. Самолетгу щядиртун, гива бувксса Бавер, инсантурал каруннай гьаз бувну бувцуну лавгун бур.

Бавер ЖахIпаровал лайкьсса кIану бувгьуссар жула авиациялул тарихраву. Ва лайкь хьуну бур личIи-личIисса орденнан ва медаллан. Ванийн Москавлив Кремлилувун оьвкуну бивкIссар цIанихсса летчиктуращалсса хьунабакьаврийн. Му чIумалсса, Иосиф Сталин ва Политбюрорал члентал гьуртту хъанахъисса, шадлугърал мажлисрай сивсусса Бавердул «Лезгинкалий» къавтIун изан увну ивкIссар К. Ворошилов.
Дяъви къуртал хьуну махъсса шиннардий ва зий бивкIссар МахIачкъалаллал «Темп» тIисса («Дружба») кинотеатрданул директорну. Ванил каялувшиву дуллалисса шиннардий ва бивкIссар республикалий яла хьхьичIунмур кинотеатрнугу. Ва даврийсса кка­ккиярттахлу Бавердун дуллуссар «ДАССР-данул ва РСФСР-данул лайкь хьусса культуралул зузала» тIисса цIагу.

1978-ку шинал оьрмулул 58 шинаву дунияллия лавгун бур Бавер. Ччяни дунияллия лавгун ур ванил ца акъа-акъасса арс Патааьлигу. ЛивчIун бур ванал наслу-оьрчIру, оьрчIал оьрчIру. 2005 шинал МахIачкъалалив Оскардул цIанийсса кIичIиравусса 15-ми къат­рал чIирайн лархъун дуссар Бавердул аьпа абад буллалисса мемориалданул ула.