Ватандалийн кIункIу хьуну ур 94 шинаву

Дагъусттаннал виваллил иширттал министр, полициялул генерал-лейтенант Аьвдурашид МахIаммадов ва миграциялул масъаларттаха зузисса управлениялул (УВМ) хъунама МахIаммад МахIаммадов

бивунни вай гьантрай Къарабудахккантуллал райондалийсса Манасккантуллал шяравун. Вай бувкIун бия, чIярусса шиннардий (75 шин) Азирбижаннай ялапар хъанай ивкIун, утти цала миналийн зана хьусса 94 шинавусса Рамазан АьлибуттаевлучIан. Ва цувагу лаккучу ур. Ца-кIива зурул хьхьичI Аьлибуттаевлул буллуну бур документ­ру Дагъусттаннал МВД-лул УВМ-райн, Аьрасатнал гражданство ласаву мурадрай. Биялну лахъи лагайсса му мурадирал масъалагу министрнал хIарачатрайну щаллу бувну бур кIива зурул дянив.


Андриана Аьбдуллаева
Министрнащалсса ва УВМ-рал зузалтращалсса хьунабакьаврий Рамазан Аьлибуттаевлул бувсун бур оьрмулул 15 шинаву увкIшиву цува Азирбижаннавун. ЧIярусса шиннардий къалайчину зий ивкIсса буттан кумаг буллай ивкIшиву. Махъ, ккарччал техникнал пишагу лавхьхьуну, зий ивкIун ур шяраваллил хозяйствалул давур­ттаха. Хъунмасса Буттал кIанттул цIанийсса дяъвилул шиннардий Рамазан зий ивкIун ур колхозраву, чIярусса давуртту дурну дур фронтран кумагран.
Ххарину дакIнийн бутлай ур Рамазан цала карунних хъун бакъасса мизит бувсса куц.
-Зий-занай тих ивкIнугу, дакI мудангу Ватандалийн кIункIу тIий дикIайва, — тIий, буслай ур ва.
Азирбижаннай 75 шин ларгун махъгу, Рамазаннун Ватандалийн зана хьун ччан бивкIун бур. Ва дакIнихтуну барчаллагь тIий ур цала хиял бартбигьин кумаг бувминнахь, чIарав бавцIуминнахь.