Щалагу дунияллул цIуллу-сагъшиву дуруччаврил идарартту, хъинну ялув бавцIуну, ххал бигьлай бур му коронавирусрая буруччинсса чаранну.
Цуксса хIайпнугу, Аьрасатнавугу коронавирус лархъсса инсантал аьлтту хъанай бур. ЧIявусса идарарттай баян буллай бур карантинну.
Имара Саидова
Цинявннал зума-ккарччулун дагьсса, инсантурал оьрмулун нигьачIаву дусса вирусрая цукун бурувччуну буссарив цIухху-бусу бувссия Туркнаву ялапар хъанахъисса лакку душнихь Аьйша АхIмадовахь.
— Гьай-гьай, Туркнал агьлугу коронавирусрая нигьачIийну бур ва, агьали муния буруччаву мурадрай, цIакьну ялув бавцIуну бур. Бувар жучIа уттигу чувчIав карантинну баян буллан. Лавкьунни так спортзаллу, бассейнну, клубру, хIаммамру ва цаймигу чIявусса инсантал батIайсса кIанттурду. Школарттай кIира-шанна нюжмардийсса каникуллу ккаккан дунни. Ттучаннайгу иникьали, макаронну, чагъардал ттупру ласлай булувкьуну бур. ТачIав пикри къабагьанссия, ишла байсса чагъарду укун тIалавну бикIанссар тIий. Вай гьантрай хIукму бувккунни аптекардая маскарду так рецептрай дакъа итакъадакьлансса. Мукунна Туркнал ларкьунни лагма-ялттусса хIукуматирттащалсса дазурду ва дацIан дунни 20-хъул билаятрайнсса самолетирттал рейсру. Аэропортирттай бивхьуну бур температурарду ххал дигьайсса камерартту. Кучардайгу инсантал чанну бур. Мизитру тIивтIунува бур, амма чIумуйнусса бацIан бунни нюжмар чакру ва гьарца кьини байсса чакру.
Хъинну чан хьунни хIукуматрал азарханардай хъин хъанай бивкIсса къашайшалт. СМИ-давухгу буслайнма бур му вирусрая мюхчанну бикIансса куц. Ччя-ччяни кару шюшланшиврул сайки гьарица бувххун нанисса кIанттурдай кару шюшинсса ва дизенфекция дуллансса шартIру дузал дурну дур. ХIакьинусса кьини Туркнаву ва вирус сававну оьрмулуцIа хьуну ур 61 шинавусса ва 89 шинавусса кIия инсан.
[dropcap]В[/dropcap]ирус дусса-дакъасса аьлтту хьуншиврул цайми хIукуматирттая зана хьусса цала миллатрал инсанталгу 14 гьантлул мутталийсса карантиндалий бихьлай бур. Мукунма карантин баян бувну буссар чIивимур хIажлия зана хьусса туркнал агьалинангу.
Укунсса тагьар дур жучIагу, бурувччуну лякъиннав цинявппа Хъунасса Заннал, укунсса хьунни жул суалданухунсса Аьйшал ихтилат.
